प्रभात वृत्तसेवा पिंपरी – शेअर बाजारात गुंतवणूक केल्यास जादा नफा मिळवून देण्याचे अमिष दाखवत एका नागरिकाची ९७ लाख ७० हजार रुपयांची फसवणूक केली. ही घटना १३ सप्टेंबर २०२५ ते १४ नोव्हेंबर २०२५ दरम्यान थेरगाव येथे घडली.अविका शर्मा आणि राकेश जैन (पत्ता पूर्ण मिळाला नाही) यांच्यासह विविध बँक खातेदारांच्या विरोधात गुन्हा दाखल करण्यात आला आहे. सुनिल श्रीपती झेंडे (वय ५६, रा. थेरगाव) यांनी शुक्रवारी (दि. २६) याबाबत सायबर पोलीस ठाण्यात फिर्याद दिली आहे. पोलिसांनी दिलेल्या माहितीनुसार, फिर्यादी सुनील झेंडे यांच्याशी आरोपींनी व्हॉट्सअॅपवरून संपर्क साधत त्यांना शेअर ट्रेडिंग ग्रुपमध्ये घेतले. त्यामध्ये १० ते १५ टक्के नफ्याचे आमिष दाखविण्यात आले. त्यानंतर फिर्यादीस RARCII नावाचे अॅप डाऊनलोड करण्यास सांगून विविध बँक खात्यात पैशांची व्यवहार करण्यास प्रवृत्त केले. अॅपमध्ये खोटा नफा दाखवून तो काढण्यासाठी पुन्हा रक्कम भरण्यास सांगण्यात आले. मात्र गुंतवलेले पैसे व परतावा न देता फिर्यादीची एकूण ९७ लाख ७० हजार रुपयांची फसवणूक करण्यात आली. या प्रकरणी पुढील तपास सायबर पोलीस ठाणे करीत आहे.
