CSK vs RCB Chennai Super Kings enters unwanted list in IPL History : आयपीएल २०२५ मध्ये सीएसकेला त्यांच्या दुसऱ्या सामन्यात ५० धावांनी पराभव स्वीकारावा लागला. सीएसकेला १७ वर्षांनी त्यांच्या घरच्या मैदानावर म्हणजेच चेपॉक स्टेडियमवर आरसीबीविरुद्ध पराभवाचा सामना करावा लागला आहे. या सामन्यात आरसीबीने प्रथम फलंदाजी करत २० षटकांत १९६ धावा केल्या, ज्याचा पाठलाग करताना सीएसकेला २० षटकांत ८ गडी गमावून केवळ १४६ धावा करता आल्या. या पराभवासह, सीएसके आयपीएलच्या त्या लज्जास्पद यादीत सामील झाले ज्यामध्ये पूर्वी फक्त ६ संघ होते.

सीएसकेचा आयपीएलमधील १०० वा पराभव –

आयपीएलच्या इतिहासात, दिल्ली कॅपिटल्स आतापर्यंत सर्वाधिक सामने गमावण्याच्या बाबतीत अव्वल स्थानावर आहे; त्यांनी एकूण १३५ सामने गमावले आहेत. तर सीएसके आता आयपीएलमध्ये १०० सामने गमावणारा ७वा संघ बनला आहे. आतापर्यंत, चेन्नई सुपर किंग्जने आयपीएलमध्ये एकूण २४१ सामने खेळले आहेत, त्यापैकी त्यांनी १३९ सामने जिंकले आहेत आणि १०० सामने गमावले आहेत. आयपीएलच्या इतिहासात धावांच्या फरकाने चेन्नई सुपर किंग्जचा आरसीबीविरुद्धचा हा तिसरा सर्वात मोठा पराभव आहे. २०१३ च्या आयपीएल हंगामात सीएसकेचा धावांच्या फरकाने सर्वात मोठा पराभव झाला होता, जेव्हा त्यांना वानखेडे स्टेडियमवर मुंबई इंडियन्सकडून ६० धावांनी पराभव पत्करावा लागला होता.

आयपीएलमध्ये सर्वाधिक सामने गमावणारे संघ:

दिल्ली कॅपिटल्स – १३५ पराभव
पंजाब किंग्स – १३४ पराभव
रॉयल चॅलेंजर्स बंगळुरु -१२९ पराभव
कोलकाता नाईट रायडर्स – १२१ पराभव
मुंबई इंडियन्स – ११८ पराभव
राजस्थान रॉयल्स – १०९ पराभव
चेन्नई सुपर किंग्ज – १०० पराभव

हेही वाचा – CSK vs RCB : ‘तो लवकर आला, खरंतर तो…’, सीएसकेच्या पराभवानंतर वीरेंद्र सेहवागने उडवली धोनीची खिल्ली

आरसीबीविरुद्धच्या पराभवानंतर सीएसकेचा नेट रन रेट घसरला –

चेन्नई सुपर किंग्ज संघाने आयपीएलच्या १८ व्या हंगामाची सुरुवात मुंबई इंडियन्सविरुद्ध ४ विकेट्सनी शानदार विजय मिळवून केली, त्यानंतर सर्वांना आरसीबीविरुद्धच्या सामन्यात त्यांच्याकडून अशाच कामगिरीची अपेक्षा होती, परंतु प्रथम गोलंदाजांनी आणि नंतर फलंदाजांनी सर्वांना निराश केले. आरसीबीविरुद्ध सीएसकेच्या पराभवानंतर, त्याचा परिणाम त्यांच्या नेट रन रेटवरही दिसून आला. जो आता २ सामन्यांत एका विजय आणि एका पराभवानंतर नेट रन रेट -१.०१३ आहे.