Crude Oil Price : अमेरिकेचे राष्ट्राध्यक्ष डोनाल्ड ट्रम्प यांनी इराणवर नव्याने हल्ला होण्याची शक्यता कमी असल्याचे संकेत दिल्यानंतर आंतरराष्ट्रीय बाजारात कच्च्या तेलाच्या किमतीत मोठी घसरण झाली आहे. अमेरिका आणि इराण यांच्यातील संघर्ष थांबण्याची आशा वाढल्याने तेल बाजारावर दबाव निर्माण झाला आहे. ब्रेंट क्रूडच्या दरात गेल्या आठवड्यात तब्बल १६ टक्क्यांची घट झाली. मात्र, होर्मुझच्या सामुद्रधुनीजवळ जहाजांवर होत असलेल्या हल्ल्यांमुळे तेल पुरवठ्याबाबतची चिंता कायम आहे.

सोमवारी ब्रेंट क्रूडचा दर ३.६ टक्क्यांनी घसरून ९४.८३ डॉलर प्रति बॅरलवर आला. तर अमेरिकेतील डब्ल्यूटीआय क्रूडचा दर २.९ टक्क्यांनी कमी होऊन ८८.१७ डॉलर प्रति बॅरल झाला.

गेल्या आठवड्यात ब्रेंट क्रूडच्या किमतीत सुमारे १६ टक्क्यांची घसरण झाली होती. या काळात दर दोन महिन्यांतील नीचांकी पातळीवर म्हणजेच ९३.२२ डॉलर प्रति बॅरलपर्यंत खाली आले. कोरोना महामारीच्या सुरुवातीपासूनची ही सर्वात मोठी साप्ताहिक घसरण ठरली.

ट्रम्प यांच्या विधानाचा तेल बाजारावर परिणाम

ट्रम्प यांनी रविवारी सांगितले की, इराणसोबत संघर्ष थांबवण्यासाठी सुरू असलेली चर्चा पुढे गेल्यास नव्याने हल्ले होण्याची शक्यता खूपच कमी आहे. त्यांच्या या विधानामुळे बाजारातील तणाव कमी झाला. मात्र, होर्मुझच्या सामुद्रधुनी परिसरात जहाजांवर हल्ले झाल्याच्या बातम्यांमुळे परिस्थिती अजूनही चिंताजनक आहे.

सॅक्सो बँकेचे विश्लेषक ओले हॅन्सन यांनी रॉयटर्सला सांगितले की, अमेरिका आणि इराण यांच्यात ठोस करार झाल्यामुळे नव्हे, तर शांततेची शक्यता निर्माण झाल्याने तेलाच्या किमती कमी होत आहेत.

तेलाचा पुरवठा वाढल्यानेही दरांवर दबाव

जेपी मॉर्गनच्या अहवालानुसार, मध्यपूर्वेतून तेलाचा पुरवठा सुधारत आहे. इतर देशांमध्येही तेलाचे उत्पादन वाढले आहे. दुसरीकडे, तेलाची मागणी तुलनेने कमी असल्याने बाजारात पुरवठा मागणीपेक्षा जास्त झाला आहे.

बँकेच्या अंदाजानुसार, सप्टेंबरमध्ये दररोज ११ लाख बॅरल, तर ऑक्टोबरमध्ये १४ लाख बॅरल तेलाचे अतिरिक्त उत्पादन झाले.

सौदी अरेबिया आणि रशियातही हल्ल्यांच्या घटना

दरम्यान, इराणसमर्थित हूती बंडखोरांनी रविवारी सौदी अरेबियाची राजधानी रियाधमधील सौदी अरामकोच्या कार्यालयांवर हल्ला केल्याची जबाबदारी स्वीकारली. तर सोमवारी युक्रेनच्या ड्रोन हल्ल्यानंतर रशियातील किरिशी तेल शुद्धीकरण प्रकल्पाला आग लागली.

या घटनांमुळे तेल पुरवठ्याबाबत अनिश्चितता कायम आहे. त्यामुळे आगामी काळात अमेरिका-इराणमधील चर्चा आणि जागतिक बाजारातील तेलाचा पुरवठा यावर कच्च्या तेलाच्या किमतींची दिशा अवलंबून राहणार आहे.