Pune News : लोणावळा येथे पर्यटनासाठी जाणाऱ्या पर्यटकांना अंमली पदार्थ (ड्रग्ज) बाळगल्याचा (Pune News) खोटा बनाव करून आणि कायदेशीर कारवाईची भीती दाखवून तब्बल पाच लाख रुपयांची खंडणी उकळण्याचा प्रयत्न केल्याचा एक धक्कादायक प्रकार समोर आला आहे.

विशेष म्हणजे पर्यटकांची सुरक्षा करणाऱ्या महामार्ग सुरक्षा पोलीस विभागाच्या खंडाळा पथकातील पोलीस कर्मचारीच या गुन्ह्याचे मास्टरमाईंड असल्याचे उघड झाले आहे.

या प्रकरणी कामशेत पोलिसांनी दोन पोलीस अंमलदार, दोन होमगार्ड आणि एका ट्रॅफिक वॉर्डनसह पाच जणांना अटक केली असून, आणखी एका पोलीस कर्मचाऱ्याचा या कटात सहभाग असल्याचे निष्पन्न झाले आहे. या घटनेमुळे पोलीस दलाच्या (Pune News) प्रतिमेला मोठा काळिमा फासला गेला आहे.

अंबर दिव्याच्या गाडीतून आले आणि अडवले

पुण्यातील विमाननगर येथे राहणारे भूषित उमेश शर्मा (वय २८) हे ५ जुलै रोजी दुपारी आपल्या मित्रांसह चारचाकी वाहनाने लोणावळ्याला पर्यटनासाठी निघाले होते. दुपारी साडेचार वाजेच्या सुमारास पुणे-मुंबई द्रुतगती मार्गावरील ताजे (ता. मावळ) गावच्या हद्दीत अंबर दिवा लावलेल्या एका झायलो वाहनाने शर्मा यांची गाडी अडवली. या वाहनातून उतरलेल्या सहा जणांनी स्वतः अधिकृत कारवाई करणारे अधिकारी असल्याचा आव आणला. त्यांनी फिर्यादी शर्मा आणि त्यांच्या मित्रांकडे अंमली पदार्थ असल्याचा संशय व्यक्त करत त्यांच्यावर कारवाई करण्याची धमकी दिली.

एटीएममधून पैसे काढण्याची सक्ती

कारवाई टाळण्यासाठी या बनावट आणि लाचखोर टोळीने पर्यटकांकडे थेट पाच लाख रुपयांच्या खंडणीची मागणी केली. एवढ्यावरच न थांबता आरोपींनी फिर्यादींना जबरदस्तीने तळेगाव दाभाडे परिसरात नेले आणि तेथील एटीएममधून पैसे काढण्यास भाग पाडण्याचा प्रयत्न केला. या मानसिक छळ आणि लुटीच्या प्रयत्नातून सुटका झाल्यानंतर फिर्यादी भूषित शर्मा यांनी तातडीने कामशेत पोलीस ठाण्यात धाव घेऊन तक्रार नोंदवली.

तांत्रिक तपासात खाकी वर्दीच निघाली गुन्हेगार

पर्यटकांसोबत घडलेल्या या गंभीर घटनेची दखल घेत पुणे ग्रामीणचे पोलीस अधीक्षक संदीप सिंह गिल यांनी तात्काळ तपासाचे आदेश दिले. कामशेत पोलिसांच्या तपास पथकाने तांत्रिक विश्लेषण, घटनास्थळाची पाहणी, साक्षीदारांचे जबाब आणि गोपनीय माहितीच्या आधारे तपास चक्रे फिरवली. या तपासात महामार्ग सुरक्षा पोलिसांच्या खंडाळा पथकातील कर्मचाऱ्यांनीच हा खंडणीचा कट रचल्याचे धक्कादायक सत्य समोर आले.

पोलिसांनी या प्रकरणात अमोल महादेव ननावरे व तुषार बाळू डावरे (दोघेही पोलीस अंमलदार), तुषार संजय घाडगे व किसन कोंडीबा बोंबले (दोघेही होमगार्ड) आणि नितेश दीपक चव्हाण (ट्रॅफिक वॉर्डन) यांना अटक केली आहे. याशिवाय अमोल अशोक वायकर या आणखी एका पोलीस अंमलदाराचा या गुन्ह्यात सहभाग असल्याचे निष्पन्न झाले असून त्याच्यावर पुढील कारवाई सुरू आहे.

पोलीस कोठडी आणि निलंबनाची कारवाई

अटक करण्यात आलेल्या पाचही आरोपींना न्यायालयाने १३ जुलैपर्यंत पोलीस कोठडी सुनावली आहे. या कोठडीच्या काळात या टोळीने महामार्गावर अशाच प्रकारे इतर पर्यटकांना लुटले आहे का, याचा सखोल तपास (Pune News) केला जाणार आहे. दरम्यान, महामार्ग सुरक्षा पोलीस दलाचे पोलीस अधीक्षक डॉ. शिवाजी पवार यांनी सादर केलेल्या अहवालाच्या आधारे दोषी पोलीस अंमलदारांना तात्काळ निलंबित करण्यात आले आहे.

कामशेत पोलीस ठाण्यात या संदर्भात गुन्हा क्रमांक १५२/२०२६ अन्वये भारतीय न्याय संहितेच्या (BNS) कलम १२७(२), १४०(३), ३०८(२), ३५१(२)(३), ३५२ आणि ३(५) अंतर्गत गुन्हा दाखल करण्यात आला असून, हायवेवरील अशा इतर खंडणीखोर रॅकेटचा शोध पोलीस घेत आहेत.