पुणे :  मालकाने विश्वासाने सोपविलेली २८ लाख रुपयांची रोकड आणि सोन्या-चांदीचे दागिने असलेली बॅग घेऊन पसार झालेल्या कामगारासह त्याच्या साथीदारांचा शोध घेण्यात खडक पोलिसांना यश आले आहे.

तब्बल २५ दिवस उत्तर प्रदेश आणि उत्तराखंडमध्ये शोधमोहीम राबवित पोलिसांनी १० हजार किलोमीटरपेक्षा अधिक प्रवास केला. या कारवाईत पोलिसांनी २६ लाख ३३ हजार रुपयांचा मुद्देमाल हस्तगत करून चौघांना अटक केली आहे.

फिर्यादी जितेंद्र ऋषिकेश सिंह यांनी त्यांच्याकडे काम करणाऱ्या विशाल सत्यपाल चौहान ( २०, रा. मिसा कलान, जिल्हा एटा, उत्तर प्रदेश) याच्याकडे रोकड आणि सोन्या-चांदीचे दागिने असलेली बॅग दिली होती. ही बॅग मुंबईतील कार्यालयात जमा करण्याची जबाबदारी त्याच्यावर सोपविण्यात आली होती.

मात्र, मुंबईला जाण्याऐवजी विशाल याने वाटेतच बॅग घेऊन पलायन केले. या बॅगेत २८ लाख रुपये रोख आणि सोन्या-चांदीचे दागिने होते. या प्रकरणी खडक पोलीस ठाण्यात गुन्हा गुन्हा दाखल करण्यात आला होता. गुन्हा दाखल झाल्यानंतर खडक पोलिसांनी विशालचा शोध सुरू केला.

मात्र, तो उत्तर प्रदेशातील आपल्या मूळ गावी तसेच नातेवाइकांच्या घरी लपून राहत असल्याने त्याचा ठावठिकाणा शोधणे पोलिसांसमोर आव्हान होते.

तपासादरम्यान विशाल याने एकट्याने हा प्रकार केला नसून, त्याचा भाऊ बिनेश सत्यपालसिंग चौहान, मित्र विकासकुमार जाधोन, राधेश्याम ऊर्फ पिकू चौहान आणि मेहुणा ब्रिजेश सुरेंद्रसिंग चौहान यांनीही या गुन्ह्यात सहभाग असल्याचे निष्पन्न झाले.

उत्तर प्रदेशात तीन वेळा पथकाची धडक
आरोपींचा शोध घेण्यासाठी खडक पोलिसांनी विशेष पथक तयार केले. या पथकात सहायक पोलीस निरीक्षक प्रसन्न जऱ्हाड, अंमलदार विनोद शिंदे, हेमंत पेरणे, मयूर भोसले, सैफ नदाफ निलेश साबळे, आणि विकास पांडूळे यांचा समावेश होता.

पथकाने उत्तर प्रदेशातील एटा, कासगंज आणि गौतमबुद्धनगर जिल्ह्यांसह उत्तराखंडमधील डेहराडून येथे शोधमोहीम राबवली.

तांत्रिक विश्लेषण, गोपनीय माहिती आणि स्थानिक पोलिसांची मदत घेऊन आरोपींचा माग काढण्यात आला. अखेर वेगवेगळ्या ठिकाणी लपून बसलेल्या आरोपींना पोलिसांनी ताब्यात घेतले. आरोपींच्या घरझडतीत मुद्देमाल हस्तगत करण्यात आला.

विकासकुमार जाधोन याच्या घरातून १२० ग्रॅम वजनाची सोन्याची दोन बिस्किटे जप्त करण्यात आली. त्यांची किंमत १६ लाख ८० हजार रुपये आहे. दुसऱ्या कारवाईत बिनेश चौहान याचा मेहुणा ब्रिजेश सुरेंद्रसिंग चौहान याच्या घरातून सात लाख रुपयांची रोकड, सोन्याची अंगठी आणि चांदीची साखळी जप्त करण्यात आली.

या प्रकारे पोलिसांनी एकूण २६ लाख ३३ हजार रुपयांचा मुद्देमाल हस्तगत केला आहे. उर्वरित मुद्देमालाबाबत पोलिसांकडून तपास सुरू आहे. अपर पोलीस आयुक्त राजेश बनसोडे, पोलीस उपायुक्त कृषिकेश रावले आणि सहायक पोलीस आयुक्त सचिन हिरे यांच्या मार्गदर्शनाखाली ही कारवाई करण्यात आली.

खडक पोलीस ठाण्याचे वरिष्ठ पोलीस निरीक्षक धनंजय पिंगळे, पोलीस निरीक्षक शर्मिला सुतार, समाधान पवार, सहायक पोलीस निरीक्षक प्रसन्न झर्‍हाड, पोलीस उपनिरीक्षक महेंद्र कांबळे, राहुल मखरे यांच्यासह पोलीस अंमलदार विनोद शिंदे, मयूर भोसले, हेमंत पेरणे, अमित जमदाडे, निलेश साबळे, विकास पांडुळे, सैफ नदाफ, उमेश मठपती, संतोष सावळे आणि सागर कुडले यांनी या मोहिमेत सहभाग घेतला.

१५ लाखाचे कर्ज

विशाल हा फिर्यादी सराफाकडे कुरिअर बॉय म्हणून वर्षभरापूर्वीच कामाला लागला होता. सोन्याचे दागिने  घडविण्यासाठी बिस्कीट तसेच मजूुरीची रक्कम मुंबईला पोहचवण्याची जबाबदारी त्याच्यावर होती. त्याच्या भावावर जवळपास १५ लाखाचे कर्ज होते. यामुळे त्यांनी संगणमताने हा गुन्हा केला.

Pune News : पुण्यातील हॉटेल वैशाली, रूपालीचे परवाने निलंबित; स्वच्छता आणि अन्न सुरक्षा नियमांचे गंभीर उल्लंघन