पुणे {प्रभात वृत्तसेवा} – पोलीस भरतीची तयारी करणाऱ्या तरुणीवर अत्याचार, तसेच धमकावून गर्भपात केल्याप्रकरणी शिवाजीनगर पोलिसांनी एका पोलीस उपनिरीक्षकाविरुद्ध गुन्हा दाखल केला. उपनिरीक्षकाने तरुणीला धमकावून जामखेड परिसरातील एका रुग्णालयात गर्भापात केल्याचे तरुणीने दिलेल्या फिर्यादीत म्हटले आहे.

किरण माणिक महामुनी ( ३८, रा. नागपूर) असे गुन्हा दाखल केलेल्या उपनिरीक्षकाचे नाव आहे. याबाबत एका तरुणीने शिवाजीनगर पोलीस ठाण्यात फिर्याद दिली आहे. तक्रारदार तरुणी पोलीस भरतीची तयारी करत आहे. महामुनीशी तिची ओळख झाली होती. त्याने तिला प्रेमाच्या जाळ्यात ओढले आणि तिच्यावर अत्याचार केला.

महामुनीने तिच्यावर शिवाजीनगर भागातील घरी वेळोवेळी अत्याचार केला. तरुणी गर्भवती झाली. त्यानंतर त्याने तिला नगर जिल्ह्यातील जामखेड परिसरात असलेल्या एका रुग्णालयात नेले. तेथे तिला धमकावून गर्भपात केला, असे तरुणीने फिर्यादीत म्हटले आहे. तरुणीने नुकतीच शिवाजीनगर पोलीस ठाण्यात तक्रार दिली. पोलीस उपनिरीक्षक काळे तपास करत आहेत.