मुंबई – देशात करोना रुग्णांमध्ये झपाट्याने वाढ होताना दिसून येत आहे. यामध्ये महाराष्ट्र राज्य आघाडीवर आहे. राज्यात मुंबई पुण्यासारख्या शहरात करोनाने पुन्हा एकदा धुकाकूळ घातला आहे. दरम्यान करोनावर नियंत्रण मिळविण्यासाठी अनेक निर्बंध लावण्यात आले आहे. अशावेळी पोलिस प्रशासनावर मोठी जबाबदारी येणार आहे. असे असताना पोलिस कर्मचाऱ्यांना करोनाने घेरले आहे. राज्यात आतापर्यंत 9 हजार 510 पोलिस कर्मचाऱ्यांना करोनाची लागण झाली आहे. याशिवाय गेल्या 24 तासात 71 पोलिसांना करोनाची लागण झाली आहे. यापार्श्वभूमीवर राज्याच्या गृहखात्याने पोलिस कर्मचाऱ्यांसाठी मोठी घोषणा केली आहे. पोलिस कर्मचाऱ्यांमध्ये करोनाची लागण होत असल्यामुळे 55 वर्षांवरील पोलिसांना ‘वर्क फ्रॉम होम’चा आदेश गृहमंत्री दिलीप वळसे पाटील यांनी दिली आहे. ते मुंबईत प्रसार माध्यमांशी बोलत होते. त्यावेळी त्यांनी ही माहिती दिली आहे. गृहमंत्री दिलीप वळसे पाटील म्हणाले की, ”आपण 55 वर्षांवरील पोलीस कर्मचाऱ्यांना वर्क फ्रॉम होमचा आदेश दिला आहे. त्यांनी कर्तव्यावर न येता घरुन काम करायचं आहे”. तसंच पोलिसांसाठी वैद्यकीय व्यवस्था तयार असल्याचंही त्यांनी सांगितले आहे.
