County Coach Banned : एका काउंटी क्रिकेट प्रशिक्षकावर दोन कनिष्ठ महिला कर्मचाऱ्यांशी अनुचित वर्तन आणि अश्लील छायाचित्रे पाठवल्याच्या आरोपाखाली 9 महिन्यांसाठी क्रिकेटमधून बंदी घालण्यात आली आहे. या बंदीपैकी 3 महिन्यांची शिक्षा सध्या स्थगित ठेवण्यात आली आहे. जर प्रशिक्षकाने यापुढे कोणतीही चूक केली नाही, तर त्याला फक्त 6 महिन्यांची शिक्षा भोगावी लागेल.

या प्रशिक्षकावर अश्लील संदेश पाठवणे आणि एका कनिष्ठ कर्मचाऱ्याला जबरदस्तीने चुंबन घेण्याचा प्रयत्न केल्याचा आरोप आहे. क्रिकेट नियामक संस्थेने बुधवारी स्वतंत्र क्रिकेट शिस्त पॅनेलच्या (Cricket Discipline Panel – CDP) निर्णयानंतर ही शिक्षा जाहीर केली. प्रशिक्षकाचे नाव वैद्यकीय कारणांमुळे गुप्त ठेवण्यात आले आहे.

आरोप काय आहेत?

निर्णयानुसार, ही घटना 2023 च्या उन्हाळ्यात आणि 2024 च्या सुरुवातीच्या काळात घडली. प्रशिक्षकाने क्लबच्या दोन महिला कर्मचाऱ्यांना वारंवार अश्लील संदेश आणि छायाचित्रे पाठवली, ज्यात त्याच्या खासगी अवयवांचे फोटोही समाविष्ट होते. याशिवाय, त्याने एका कर्मचाऱ्याला चेंजिग रुममध्ये बोलावून तिचे जबरदस्तीने चुंबन घेण्याचा प्रयत्न केला.

हेही वाचा – ICC Awards : आयसीसीची मोठी घोषणा! शुबमन गिल आणि बेन स्टोक्समध्ये पुन्हा टक्कर

एका पीडित कर्मचाऱ्याने सांगितले की, तिने अश्लील फोटोंना कोणताही प्रतिसाद दिला नाही, तरीही प्रशिक्षकाने तिला आणखी दोन फोटो पाठवले. दुसऱ्या घटनेत, कचरा पाहण्याच्या बहाण्याने तिला चेंजिग रुममध्ये बोलावून चुंबन घेण्याचा प्रयत्न केला, ज्यामुळे ती मागे हटली.

हेही वाचा – Rashid Khan : राशिद खानचा टी-२० क्रिकेटमध्ये ऐतिहासिक विक्रम! ‘हा’ पराक्रम करणारा ठरला जगातील पहिलाच गोलंदाज

पॅनेलने काय म्हटले?

पॅनेलने प्रशिक्षकाच्या वर्तनाचा तीव्र निषेध केला. त्यांनी म्हटले की, प्रशिक्षकाचे वय आणि उच्च पद यामुळे त्याची बाजू स्पष्टपणे वरचढ होती. त्याने स्वीकारलेले चुकीचे वर्तन आधुनिक समाजात किंवा क्रिकेटच्या वातावरणात कदापि मान्य नाही. क्रिकेटमध्ये सहभागी होणाऱ्या महिलांना सुरक्षित आणि सन्मानजनक वातावरण मिळायला हवे. या घटनेनंतर प्रशिक्षकाला काउंटी क्रिकेट क्लबमधून काढून टाकण्यात आले असून, त्याने तेव्हापासून क्रिकेटमध्ये कोणतेही काम केलेले नाही. सध्या तो प्रोफेशनल क्रिकेटर्स असोसिएशनकडून मानसिक आरोग्याशी संबंधित मदत घेत आहे.