नवी दिल्ली : देशात करोनाच्या दुसऱ्या लाटेचे थैमान काही प्रमाणात कमी होत असल्याचे चित्र निर्माण झाले आहे. मात्र असे असले तरी आता तिसऱ्या लाटेचा  धोका देशावर असल्याचा अंदाज तज्ज्ञांनी व्यक्त केला आहे. त्यातही चिंतेची बाब म्हणजे ही लाट लहान मुलांसाठी धोक्याची असल्याचे बोलले जात आहे. या लाटेत मुलांना धोका कमी व्हावा यासाठी तज्ज्ञांनी आता फ्लूची लस द्यावी अशी शिफारस केली आहे.

मुलुंड येथील डॉ. जेसल सेठ यांनी  याविषयी माहिती दिली. “करोनाच्या पहिल्या लाटेमध्ये 60 वर्षावरील वृद्ध लोकांना मोठ्या प्रमाणावर लागण झाली. करोनाच्या दुसऱ्या लाटेमध्ये तरुण वयोगटातील लोकांमध्ये कोरोनाचा प्रसार मोठ्या प्रमाणावर झाल्याचे दिसून येत आहे. त्यामुळे प्रौढ वयोगटातील बहुतांश लोकांना एक तर करोना होऊन गेला आहे किंवा त्यांनी करोनाच्या एक किंवा दोन्ही लसी घेतल्या आहेत.

त्यामुळे देशात तिसरी लाट येण्याची शक्यता असताना त्याचा फटका हा बालकांना मोठ्या प्रमाणावर बसण्याची शक्यता आहे. त्यामुळे या तिसऱ्या लाटेदरम्यान बालकांमध्ये तीव्र प्रकारचा ताप किंवा लक्षणं दिसू नयेत याकडे आता वैद्यकीय तज्ज्ञांनी याकडे लक्ष देण्याची गरज आहे.”

पाच वर्षाच्या आतील मुलांना फ्लूची लस द्यावी अशी शिफारस इंडियन अॅकेडमी ऑफ पेडियाट्रिक्सने या आधीच केली आहे. अमेरिकेत करण्यात आलेल्या एका अभ्यासातून स्पष्ट झालंय की, ज्या मुलांना इन्फ्लूएंझा फ्लूची लस देण्यात आली आहे त्या मुलांमध्ये करोनाचा प्रसार कमी प्रमाणात झाला आहे.

कोविड 19 आणि इन्फ्लुएंझा या दोन्हीमध्ये काही समान लक्षणं दिसून येतात. जर कोरोनाच्या या लाटेमध्ये इन्फ्लुएंझाची साथ आल्यास या महामारीची तीव्रता आणखी वाढण्याची शक्यता आहे. त्यामुळे जर बालकांना फ्लूची लस आधीच दिली तर कोरोनाच्या तिसऱ्या लाटेचा फटका हा दुसऱ्या लाटेप्रमाणे बसणार नाही, या लसीमुळे बालकांच्या रोगप्रतिकारक शक्तीमध्ये मोठ्या प्रमाणात वाढ होईल.

बालकांना फ्लूची लस दिल्यास आरोग्य यंत्रणवरचा ताण कमी होईल तसेच आता ज्या प्रमाणात चाचण्या कराव्या लागतात त्या प्रमाणातही घट होईल. महाराष्ट्र राज्य सरकारने स्थापन केलेल्या पेडियाट्रिक टास्कफोर्सनेही या फ्लूच्या डोसची शिफारस केली आहे. त्यांच्या मते, हा डोस जर बालकांना दिला तर कोरोनाच्या तिसऱ्या लाटेचा फटका कमी प्रमाणात बसेल.

करोनाची लस आणि फ्लूची लस या दोन्ही लसी वेगवेगळ्या आहेत. या दोन लसींमध्ये चार आठवड्यांचे अंतर ठेवणं गरजेचं आहे. त्यामुळे बालकांच्या शरीरात अॅन्टिबॉडी तयार होऊ शकतील आणि त्यांचं शरीर कोरानाविरोधात लढण्यासाठी सज्ज होईल.