पुणे : मुंबई-बंगळुरू महामार्गावरील नर्हे येथील भूमकर पुलावर भरधाव कंटेनरच्या चालकाचे नियंत्रण सुटल्याने त्याने समोरून जाणाऱ्या पाच वाहनांना एकापाठोपाठ धडक दिली. शुक्रवारी मध्यरात्री साडेबारा वाजण्याच्या सुमारास झालेल्या या भीषण अपघातात एकाचा मृत्यू झाला, तर चार जण गंभीर जखमी झाले.

कंटेनर चालकाचे वाहनावरील नियंत्रण सुटल्याने त्याने पुढील वाहनांना जोरदार धडक दिली. या धडकेनंतर वाहनांचे मोठ्या प्रमाणात नुकसान झाले. काही वाहनांमधील प्रवासी वाहनातच अडकून पडले होते. अपघाताच्या मोठ्या आवाजाने परिसरातील नागरिकांनी घटनास्थळी धाव घेत मदतकार्य सुरू केले.

घटनेची माहिती मिळताच स्थानिक पोलीस आणि अग्निशमन दलाचे पथक तातडीने घटनास्थळी दाखल झाले. वाहनांमध्ये अडकलेल्या जखमींना बाहेर काढण्यासाठी अग्निशमन दलाच्या जवानांनी गॅस कटरच्या सहाय्याने वाहनांचे पत्रे कापले. त्यानंतर जखमींना बाहेर काढून तातडीने रुग्णालयात दाखल करण्यात आले.

या अपघातात एका व्यक्तीचा मृत्यू झाला असून चार जण गंभीर जखमी आहेत. जखमींवर रुग्णालयात उपचार सुरू आहेत. दरम्यान, अपघातामुळे मुंबई-बंगळुरू महामार्गावरील वाहतूक काही काळ विस्कळीत झाली होती. पोलिसांनी अपघातग्रस्त वाहने बाजूला करून वाहतूक सुरळीत केली. अपघात नेमका कशामुळे झाला, कंटेनरचा वेग किती होता तसेच चालकाचे नियंत्रण कशामुळे सुटले, याबाबत पोलीस तपास करीत आहेत.

हेही वाचा: 

Top 15 News: राज्यातील सर्वात लांब उड्डाणपुलाचे आज उद्घाटन ते तृणमूलच्या दोन गटांना नवीन नावे आणि चिन्हे; जाणून घ्या TOP 15 News