मुंबई : आगामी मुंबई महानगरपालिका निवडणुकीच्या पार्श्वभूमीवर शिवसेना (उद्धव बाळासाहेब ठाकरे) आणि महाराष्ट्र नवनिर्माण सेना (मनसे) यांच्यात युती होण्याची जोरदार चर्चा सुरू आहे. 5 जुलै 2025 रोजी मुंबईतील वरळी डोम येथे झालेल्या एका संयुक्त मेळाव्यात उद्धव ठाकरे आणि राज ठाकरे हे चुलत बंधू 20 वर्षांनंतर एकाच व्यासपीठावर दिसले.

या मेळाव्यात उद्धव ठाकरे यांनी राज ठाकरेंसमोर युतीचा प्रस्ताव ठेवला, ज्याला राज ठाकरे यांनी तात्काळ प्रतिसाद दिला नसला तरी शिवसेना (UBT) नेते संजय राऊत यांनी मनसेशी युतीसाठी सकारात्मक पावले उचलण्याचे संकेत दिले आहेत. या घडामोडींमुळे महाविकास आघाडी आणि इंडिया आघाडीच्या भवितव्याबाबत प्रश्नचिन्ह निर्माण झाले आहे.

मराठी अस्मितेच्या मुद्द्याने ठाकरे बंधूंना आणले एकत्र

5 जुलै 2025 रोजी मुंबईत झालेला मेळावा हा महाराष्ट्र सरकारने प्राथमिक शाळांमध्ये हिंदी भाषा सक्तीच्या तिसऱ्या भाषेच्या धोरणाला मागे घेतल्याच्या विजयोत्सवासाठी आयोजित करण्यात आला होता. या मेळाव्यात उद्धव आणि राज ठाकरे यांनी ‘मराठी भाषा’ आणि ‘मराठी माणूस’ यांच्या हक्कांसाठी एकत्र येण्याचे संकेत दिले.

उद्धव यांनी युतीची शक्यता स्पष्टपणे व्यक्त करत, “आम्ही एकत्र आलो आहोत आणि एकत्र राहू. मुंबई महानगरपालिका आणि महाराष्ट्रात सत्ता मिळवू,” असे जाहीर केले. यावेळी राज ठाकरे यांनी, “बाळासाहेब ठाकरे यांना जे जमले नाही, ते देवेंद्र फडणवीस यांनी केले,” असे उपरोधिकपणे सांगत हिंदी सक्तीच्या मुद्द्यावर सरकारला माघार घ्यायला लावल्याचा दावा केला.

मनसेच्या युतीसाठी जनतेचा दबाव : संजय राऊत

संजय राऊत यांनी स्थानिक स्वराज्य संस्थांच्या निवडणुकीसाठी वेगळी समीकरणे असतात, असे स्पष्ट करत मनसेच्या युतीसाठी जनतेचा दबाव असल्याचे सांगितले. राऊत म्हणाले, “इंडिया आघाडी आणि महाविकास आघाडी या लोकसभा आणि विधानसभेसाठी तयार झाल्या होत्या. मात्र, महानगरपालिका, जिल्हा परिषद आणि नगरपंचायतींच्या निवडणुकीसाठी वेगळी रणनीती लागते.

जनतेचा दबाव आहे की शिवसेना (UBT) आणि मनसेने एकत्र यावे.” राऊत यांनी मविआ आणि इंडिया आघाडीपासून काहीसे अंतर ठेवण्याचे संकेत देत, “काँग्रेस स्वतंत्रपणे निवडणूक लढू शकते, ज्याप्रमाणे आम्ही पूर्वी भाजपसोबत असताना स्वतंत्रपणे BMC निवडणूक लढलो होतो,” असे नमूद केले.

आमचीही स्वबळाची तयारी सुरू आहे : काँग्रेस

संजय राऊत यांच्या वक्तव्यावर काँग्रेसचे माजी प्रदेशाध्यक्ष नाना पटोले यांनी सावध प्रतिक्रिया दिली. ते म्हणाले, “स्थानिक स्वराज्य संस्थांच्या निवडणुकीचे निर्णय स्थानिक पातळीवर घेतले जातात. आघाडी करायची की स्वबळावर लढायचे, हा निर्णय त्या वेळी घेतला जाईल. प्रत्येक पक्ष स्वबळाची तयारी करत असतो, आमचीही तयारी सुरू आहे. कोणी काय बोलले तरी अंतिम निर्णय हायकमांड घेईल.” यावरून काँग्रेस आणि शिवसेना (UBT) यांच्यातील तणाव दिसून येत आहे, विशेषतः मविआच्या एकजुटीवर प्रश्नचिन्ह उपस्थित झाले आहे.