District Bank Election : यवतमाळ जिल्हा मध्यवर्ती सहकारी बँकेच्या निवडणुकीत यंदा मोठी राजकीय उलथापालथ पाहायला मिळाली. तब्बल २५ वर्षांपासून असलेली काँग्रेसची सत्ता उलथवून महायुतीने बँकेवर आपले वर्चस्व प्रस्थापित केले आहे.

महायुतीच्या बळीराजा पॅनेलचे १६ संचालक निवडून आले, तर महाविकास आघाडीच्या शेतकरी सहकार पॅनेलचे ९ उमेदवार विजयी झाले. या निकालामुळे पालकमंत्री संजय राठोड यांचे राजकीय बळ वाढल्याचे मानले जात आहे.

मात्र, या निवडणुकीतील सर्वाधिक चर्चेचा विषय ठरला तो उमरेखडमधील अटीतटीचा सामना. दोन उमेदवारांना समान मतं मिळाल्याने निकालाचा निर्णय थेट ईश्वरचिठ्ठीद्वारे घ्यावा लागला. ज्याची जोरदार चर्चा होत आहे.

समान मतांमुळे घेतला निर्णय

उमरेखड मतदारसंघात झालेल्या मतदानात २१ पैकी एक मत बाद ठरले, तर एक मत अपक्ष उमेदवार अंकुश देवसरकर यांना मिळाले. महाविकास आघाडीचे राम देवसरकर आणि महायुतीचे उमेदवार, माजी आमदार प्रकाश पाटील देवसरकर यांना समान २५ मतं मिळाली.

समान मतांमुळे निवडणुकीचा निकाल अनिश्चित झाला. यानंतर प्रकाश पाटील देवसरकर यांनी निकालावर आक्षेप घेत फेरमतमोजणीची मागणी केली. मात्र, फेरमतमोजणीनंतरही दोन्ही उमेदवारांची मतसंख्या समानच राहिली.

अखेर ईश्वरचिठ्ठीने निकाल ठरला!

दोन्ही उमेदवारांना समान मतं मिळाल्याने निवडणूक निर्णय अधिकाऱ्यांनी नियमानुसार ईश्वरचिठ्ठीद्वारे निकाल निश्चित करण्याचा निर्णय घेतला. यावेळी निघालेल्या चिठ्ठीत महाविकास आघाडीचे राम देवसरकर यांचं नाव आलं आणि त्यांना विजयी घोषित करण्यात आले.

अगदी शेवटच्या टप्प्यापर्यंत रंगलेल्या या लढतीत ईश्वरचिठ्ठीने राम देवसरकर यांच्या बाजूने कौल दिला. त्यामुळे महाविकास आघाडीच्या कार्यकर्त्यांमध्ये उत्साहाचे वातावरण निर्माण झाले. विजयानंतर कार्यकर्त्यांनी गुलालाची उधळण करत जल्लोष साजरा केला.

महायुतीचं वर्चस्व, पण ईश्वरचिठ्ठीचीच चर्चा!

यवतमाळ जिल्हा बँकेच्या निवडणुकीत महायुतीच्या बळीराजा पॅनेलने १६ जिंकल्या. दुसरीकडे, महाविकास आघाडीच्या शेतकरी सहकार पॅनेलने ९ जागांवर विजय मिळवला. मात्र, उमरेखडमधील समान मतं आणि ईश्वरचिठ्ठीमुळे लागलेला निकाल या निवडणुकीतील विशेष चर्चेचा विषय ठरला आहे.

Rafale case: राफेल प्रकरणात राहुल गांधींना दिलासा ; सर्वोच्च न्यायालयाकडून सुनावणीला स्थगिती