Nitin Navin : ‘ज्ञानेश कुमार जातील..’; राहुल गांधींची पोस्ट; भाजपकडून जोरदार पलटवार, नितीन नवीन म्हणाले…
Nitin Navin : भाजपचे राष्ट्रीय अध्यक्ष नितीन नवीन यांनी राहुल गांधी आणि इंडिया आघाडीवर टीका करत देश अस्थिर करण्याचा प्रयत्न केला जात असल्याचा आरोप केला.
Nitin Navin : मुख्य निवडणूक आयुक्त ज्ञानेश कुमार यांच्या राजीनाम्याच्या मागणीवर जोर वाढला आहे. कॉकरोच जनता पार्टीच्या (CJP) आंदोलनाच्या पार्श्वभूमीवर लोकसभेतील विरोधी पक्षनेते राहुल गांधी यांनी सोशल मीडिया प्लॅटफॉर्म ‘एक्स’वर पोस्ट करत केंद्र सरकारवर निशाणा साधला. त्यांच्या या पोस्टनंतर भाजपने जोरदार पलटवार केला आहे.
भाजपचे राष्ट्रीय अध्यक्ष नितीन नवीन यांनी राहुल गांधी आणि इंडिया आघाडीवर टीका करत देश अस्थिर करण्याचा प्रयत्न केला जात असल्याचा आरोप केला. या मुद्यावर ते पत्रकार परिषदेत बोलत होते. CJP च्या आंदोलनापूर्वी राहुल गांधी यांनी ‘एक्स’वर पोस्ट शेअर केली होती. या पोस्टमध्ये त्यांनी मुख्य निवडणूक आयुक्त ज्ञानेश कुमार यांच्या राजीनाम्याच्या मुद्द्यावर भाष्य केले होते.
‘देश अस्थिर करण्याचा प्रयत्न’; नितीन नवीन यांचा आरोप
भाजपचे राष्ट्रीय अध्यक्ष नितीन नवीन यांनी राहुल गांधी आणि इंडिया आघाडीवर जोरदार टीका केली. देशात अस्थिरता निर्माण करण्याचा काही शक्तींकडून प्रयत्न होत असल्याचा आरोप त्यांनी केला. अशा प्रयत्नांना जोरदार प्रत्युत्तर दिले जाईल आणि त्यांचे मनसुबे यशस्वी होऊ दिले जाणार नाहीत, अशी भूमिका त्यांनी मांडली.
Nitin Navin, Amit Shah
तसेच शहरी नक्षलवादी मानसिकतेचे काही लोक देश अस्थिर करण्याचा प्रयत्न करत असल्याचा आरोपही नवीन यांनी केला. भाजप विकसित भारत घडवण्यासाठी कटिबद्ध असून, देशाच्या स्थैर्याला आव्हान देणाऱ्या शक्तींशी ठामपणे सामना केला जाईल, असे त्यांनी स्पष्ट केले.
राहुल गांधी नेमके काय म्हणाले?
ज्ञानेश कुमार जातील. हे सरकार जाईल. मग लोकशाहीच्या दुरुस्तीला सुरुवात होईल, अशी पोस्ट राहुल गांधी यांनी त्यांच्या एक्स अकाऊंटवरून केली होती.
इंडिया आघाडीच्या खासदारांची राष्ट्रपतींसोबत भेट
९ ऑक्टोबर रोजी राहुल गांधी आणि इंडिया आघाडीतील अन्य खासदारांनी या मुद्द्यावर राष्ट्रपतींची भेट घेतली. या भेटीत मतदार याद्यांमधील कथित अनियमितता, विशेष सखोल पुनरीक्षण प्रक्रिया (SIR) आणि मुख्य निवडणूक आयुक्त ज्ञानेश कुमार यांच्या राजीनाम्याची मागणी यांसारख्या मुद्द्यांवर चर्चा झाल्याचे सांगितले जात आहे.
ज्ञानेश कुमार जाएँगे।
यह सरकार जाएगी।
फिर शुरू होगी लोकतंत्र की मरम्मत। 🇮🇳 https://t.co/spGmBxgXLn— Rahul Gandhi (@RahulGandhi) October 10, 2026
राहुल गांधी आणि इंडिया आघाडी काय उत्तर देणार?
एकीकडे विरोधकांकडून निवडणूक प्रक्रियेतील कथित त्रुटींवर प्रश्न उपस्थित केले जात आहेत, तर दुसरीकडे भाजपकडून देशाच्या स्थैर्याचा मुद्दा उपस्थित केला जात आहे. आता नितीन नवीन यांच्या आरोपांवर राहुल गांधी आणि इंडिया आघाडीतील नेते काय प्रतिक्रिया देतात, याकडे सर्वांचे लक्ष लागले आहे.
