प्रदेशाध्यक्ष नाना पटोले यांची माहिती
पुणे : कसबा विधानसभा मतदारसंघ 1980 पर्यंत कॉंग्रेसच्या ताब्यात होता. येथे कॉंग्रेसचे वर्चस्व असल्याने पक्षाने निवडणुकीची तयारी सुरू केली आहे. पक्षाचा उमेदवार येत्या 4 फेब्रुवारीपर्यंत जाहीर करण्याची घोषणा कॉंग्रेसचे प्रदेशाध्यक्ष नाना पटोले यांनी सोमवारी पुण्यात केली. त्यामुळे महाविकास आघाडीत ही जागा कॉंग्रेस लढविणार असल्याचेही स्पष्ट झाले असून, आघाडीत या जागेसाठीच्या बैठका केवळ औपचारिकता ठरण्याची चिन्हे आहेत.

पटोले म्हणाले, “कसबा पोटनिवडणुकीसाठी आतापर्यंत आमच्याकडे 10 जणांनी अर्ज पाठविले आहेत. तसेच आणखी काही इच्छूक आहेत. त्यामुळे पक्षाकडून सारासार विचार करून उमेदवारी दिली जाईल. अर्ज भरण्याची अखेरची मुदत 7 फेब्रुवारी असली, तरी दि.4 फेब्रुवारी आम्ही उमेदवार जाहीर करू.’

दरम्यान, या मतदारसंघात कॉंग्रेसकडून शहराध्यक्ष अरविंद शिंदे, सहयोगी सदस्य रवींद्र धंगेकर, माजी महापौर कमल व्यवहारे, माजी नगरसेवक गोपाळ तिवारी, माजी शिक्षणमंडळ अध्यक्षा संगीता तिवारी यांच्यासह आणखी काही कार्यकर्त्यांनी तिकिटाची मागणी केली असल्याची चर्चा आहे. त्यामुळे आता तिकीट कोणाला जाहीर होते, हे पाहणे महत्त्वाचे आहे.

कॉंग्रेस प्रदेशाध्यक्ष नाना पटोले यांनी कॉंग्रेसचा निर्णय जाहीर केला आहे. मागील विधानसभेत हा मतदारसंघ कॉंग्रेसकडे होता. त्यामुळे त्यांनी दावा सांगितला आहे. मात्र, आमच्याही पक्षात इच्छूक आहेत. त्यामुळे महाविकास आघाडीचे घटक म्हणून आमचे पक्षप्रमुख जो निर्णय घेतील, तो आम्हाला मान्य असेल.
प्रशांत जगताप, शहराध्यक्ष, राष्ट्रवादी कॉंग्रेस

कसबा मतदारसंघाची राजकीय पार्श्‍वभूमी बघून आमचे वरिष्ठ निर्णय घेतील. मागील निवडणुकीत आम्ही भाजपसोबत होतो. तर शिवसेनेचा नगरसेवक अपक्ष म्हणून लढला होता. पक्षाच्या आदेशावर चालणारे आम्ही पदाधिकारी आहोत. पक्षश्रेष्ठी घेतील तो निर्णय आम्हाला मान्यच असेल.
– गजानन थरकुडे, शहरप्रमुख, शिवसेना (उद्धव ठाकरे गट)

आघाडीची बैठक लांबणीवर
कसबा पोटनिवडणुकीची जागा महाविकास आघाडीत कोणाकडे असावी, शिवाय रणनिती ठरविण्यासाठी महाविकास आघाडीच्या शहर पदाधिकाऱ्यांची सोमवारी बैठक होणार होती. मात्र, कॉंग्रेसचे प्रदेशाध्यक्ष नाना पटोले पुण्यात असल्याने ही बैठक लांबणीवर पडली. आता ही बैठक मंगळवारी होणार आहे. मात्र, आता कॉंग्रेस प्रदेशाध्यक्षांनी थेट ही जागा कॉंग्रेस लढविणार असल्याचे स्पष्ट केल्याने ही बैठक केवळ औपचारिक ठरणार आहे.