Congress News : विधान परिषद निवडणुकीच्या ऐन रंगात काँग्रेसला (Congress News) मोठा धक्का देणारे यवतमाळचे नेते साहेबराव कांबळे यांनी अखेर आपल्या राजकीय प्रवासाची नवी दिशा निश्चित केली आहे. पक्षादेश डावलून उमेदवारी अर्ज मागे घेतल्यामुळे काँग्रेसमधून हकालपट्टी झालेले साहेबराव कांबळे यांनी आज अधिकृतपणे उपमुख्यमंत्री एकनाथ शिंदे यांच्या उपस्थितीत शिवसेनेमध्ये प्रवेश केला.

उपमुख्यमंत्री एकनाथ शिंदे यांच्या मलबार हिल येथील नंदनवन या निवासस्थानी त्यांचा पक्षप्रवेश सोहळा पार पडला. यावेळी कांबळे यांच्यासह काँग्रेस (Congress News) आणि प्रहार संघटनेच्या हजारो पदाधिकाऱ्यांनीही हाती ‘धनुष्यबाण’ घेतला.

ऐनवेळी माघार अन् काँग्रेसची कडक कारवाई

विधान परिषद निवडणुकीत काँग्रेसने यवतमाळ मतदारसंघातून साहेबराव कांबळे यांना, तर वर्धा-चंद्रपूर-गडचिरोली मतदारसंघातून शैलेश अग्रवाल यांना अधिकृत उमेदवारी दिली होती. मात्र, नामांकन अर्ज मागे घेण्याच्या शेवटच्या दिवशी या दोन्ही नेत्यांनी पक्ष नेतृत्वाला पूर्णपणे अंधारात ठेवत आपले उमेदवारी अर्ज मागे घेतले.

या नाट्यमय घडामोडीमुळे काँग्रेसवर नामुष्की ओढवली आणि पक्षासमोर मोठ्या अडचणी निर्माण झाल्या. या गंभीर पक्षशिस्तभंगाची दखल घेत काँग्रेसने तातडीने कारवाई करत साहेबराव कांबळे आणि शैलेश अग्रवाल या दोन्ही बड्या नेत्यांचे प्राथमिक सदस्यत्व रद्द करून त्यांची पक्षातून हकालपट्टी केली होती.

यवतमाळमध्ये ‘शिंदेसेने’ची ताकद वाढली

काँग्रेसने (Congress News) हकालपट्टी केल्यानंतर २४ तास उलटण्यापूर्वीच साहेबराव कांबळे यांनी शिंदेसेनेत प्रवेश करत काँग्रेसला प्रत्युत्तर दिले आहे. कांबळे यांच्या पक्षप्रवेशामुळे यवतमाळ जिल्ह्यातील राजकीय समीकरणे वेगाने बदलण्याची शक्यता आहे. विशेष म्हणजे, या मतदारसंघात भाजपच्या किसनराव वानखेडे यांच्या विरोधात महायुतीला (विशेषतः शिंदेसेनेला) साहेबराव कांबळे यांच्या रूपाने एक तगडा आणि अनुभवी चेहरा मिळाला आहे.

साहेबराव कांबळे यांच्यासोबत आलेल्या हजारो कार्यकर्त्यांमुळे यवतमाळ आणि परिसरात शिंदेसेनेची ताकद कमालीची वाढली असून, आगामी काळात याचा फायदा महायुतीला मिळण्याची दाट शक्यता वर्तवली जात आहे.