नवी दिल्ली – डॉलरच्या तुलनेत रुपयाच्या मूल्यात सतत होत असलेल्या घसरणीबद्दल तीव्र चिंता व्यक्त करताना काँग्रेसने पंतप्रधान नरेंद्र मोदींवर निशाणा साधला. असे दिसते की सरकारने डॉलरच्या तुलनेत रुपया शतकापर्यंत पोहोचवण्याचा संकल्प केला आहे अशी टीका कॉंग्रेसने केली आहे. रुपयाच्या अवमूल्यनामुळे आर्थिक आव्हानांमध्ये वाढ होण्याची भीती व्यक्त करताना पक्षाने म्हटले आहे की याचा थेट परिणाम सामान्य लोकांवर होईल कारण महागड्या आयातीमुळे जीवनावश्यक वस्तूंच्या किमती वाढतील आणि महागाई देखील वाढेल.

काँग्रेस पक्षाच्या सोशल-डिजिटल मीडिया विभागाच्या प्रमुख सुप्रिया श्रीनेत यांनी पंतप्रधान होण्यापूर्वी नरेंद्र मोदी यांनी रुपयाच्या घसरणीबाबत केलेल्या विधानांचा संदर्भ देत सरकारवर निशाणा साधला आणि म्हटले की, तेव्हा पंतप्रधानांनी असे म्हटले होते की रुपयाच्या मूल्याबरोबरच पंतप्रधान आणि त्यांचे पद यांची प्रतिष्ठा देखील घसरत आहे.

आज पंतप्रधानांची प्रतिष्ठा किती घसरली आहे, असा उपहासात्मक सवालही श्रीनेत यांनी केला. सप्टेंबर २०२४ पासून रिझर्व्ह बँकेतून ८० अब्ज डॉलर्स काढून घेतल्यानंतरही रुपयाची घसरण थांबत नाहीये. देशाचा परकीय चलन साठा सप्टेंबर २०२४ मध्ये ७०४ अब्ज डॉलर्सच्या उच्चांकावरून ६२५ अब्ज डॉलर्सच्या १० महिन्यांच्या नीचांकी पातळीवर आला आहे.

आकडेवारीचा हवाला देत काँग्रेस प्रवक्त्यांनी सांगितले की, २०१४ मध्ये जेव्हा पंतप्रधान मोदींनी पंतप्रधानपदाची सूत्रे हाती घेतली तेव्हा डॉलरच्या तुलनेत रुपयाचे मूल्य ५८ होते जे आता ८७ रुपयांच्या आसपास पोहोचले आहे आणि स्वातंत्र्यानंतर, पंतप्रधान मोदींच्या कार्यकाळात, डॉलरच्या मूल्यात १०% वाढ झाली आहे. डॉलरच्या तुलनेत रुपयात कमाल अवमूल्यन ३४ टक्के नोंदवले गेले.

पंडित नेहरूंच्या कार्यकाळात डॉलरच्या तुलनेत रुपयाचे मूल्य दोन टक्क्यांनी, इंदिरा गांधींच्या पहिल्या आणि दुसऱ्या कार्यकाळात दोन ते पाच टक्क्यांनी आणि राजीव गांधी आणि व्हीपी सिंह यांच्या कार्यकाळात एकूण सहा टक्क्यांनी घसरले. पी.व्ही. नरसिंह राव यांना वारशाने एक विस्कळीत अर्थव्यवस्था मिळाली आणि रुपयाचे १७ टक्क्यांनी अवमूल्यन झाले.

अटलबिहारी वाजपेयी यांच्या कार्यकाळात ११ टक्के आणि डॉ. मनमोहन सिंग यांच्या १० वर्षांच्या कार्यकाळात १७ टक्के घट झाली. रुपयाच्या घसरणीमुळे रिझर्व्ह बँक व्याजदर वाढवू शकते, ज्यामुळे ईएमआयवर परिणाम होईल आणि सामान्य लोकांवर आर्थिक भार वाढेल, अशी भीती काँग्रेस नेत्याने व्यक्त केली.