पिंपरी, (प्रतिनिधी) – पिंपरी चिंचवड महापालिकेच्या वतीने आयोजित केलेल्या जनसंवाद सभेत समिवारी (दि.12) एकून 57 तक्रारवजा सूचना प्राप्त झाल्या. बहुतांशी तक्रारी या अपुरा पाणीपुरवठा, पदपथांवरील फळविक्रेत्यांचे अतिक्रमणांबाबतच्या होत्या.

प्रत्येक महिन्याच्या दुसर्‍या आणि चौथ्या सोमवारी जनसंवाद सभेचे आयोजन सर्व क्षेत्रीय कार्यालयांत करण्यात येते. सभेचे अध्यक्ष तथा मुख्य समन्वयक म्हणून नेमणूक करण्यात आलेल्या अधिकार्‍यांनी त्यांना नेमून दिलेल्या महापालिका क्षेत्रीय कार्यालयात उपस्थित राहून नागरिकांना महापालिकेच्या अनुषंगाने असलेली कामे, अडचणी, तक्रारी, सूचना या सर्व बाबींची नोंद घेऊन संबधितांना या बाबतीत कार्यवाही करण्याच्या सूचना महापालिकेकडून दिल्या गेल्या आहेत.

सोमवारी पार पडलेल्या जनसंवाद सभेत अ, ब, क, ड, इ, फ, ग आणि ह क्षेत्रीय कार्यालयांमध्ये अनुक्रमे 10, 6, 5, 7, 3, 2, 15 आणि 9 तक्रारी वजा सूचना मांडल्या. क्षेत्रीय कार्यालयांच्या जनसंवाद सभेचे अध्यक्षपद मुख्य समन्वय अधिकारी असलेले अतिरिक्त आयुक्त उल्हास जगताप, मुख्य अभियंता श्रीकांत सवणे, सह आयुक्त चंद्रकांत इंदलकर, सह शहर अभियंता मनोज सेठीया, संजय कुलकर्णी, प्रमोद ओंभासे, उप आयुक्त अजय चारठाणकर यांनी भूषवले. तसेच यावेळी क्षेत्रीय अधिकारी सुचिता पानसरे, अमित पंडित, अण्णा बोदडे, डॉ. अंकुश जाधव, राजेश आगळे, सिताराम बहुरे, अजिंक्य येळे, उमेश ढाकणे उपस्थित होते.

आज झालेल्या जनसंवाद सभेत पाणीपुरवठा योग्य दाबाने करावा, रस्त्यांवरील खड्डे बुजविण्याचे काम वेगाने करावे. पदपथांवर उभारण्यात आलेले अतिक्रमण काढावेत, रस्त्यांची साफसफाई तसेच रस्त्याच्या पातळीपासून खोल गेलेले चेंबर व फुटलेल्या मलवाहिन्या लवकर दुरुस्त कराव्यात, रस्त्याच्या कडेला पदपथांवर अनधिकृत फळविक्रेते, हातगाड्या तसेच उभारण्यात आलेले अतिक्रमण काढावेत, त्याठिकाणी पुन्हा अतिक्रमण होणार नाही याची दक्षता घ्यावी अशा सूचनांचा प्रामुख्याने समावेश होता.