राजगुरूनगर – जून व जुलै 2023 महिन्यातील पूर व अतिवृष्टीमुळे पिके व शेतजमिनींचे नुकसान झालेल्या शेतकऱ्यांना मदत करण्यासाठी राज्य सरकारने तात्काळ 1,071 कोटींचा निधी मंजूर केला आहे. तसेच आनंदाचा शिधा वाटपात पोहे आणि मैद्याचा समावेश केल्याने सामान्य कुटुंबांचे नागरिकांना यावर्षी दिवाळीचे दिवस आनंदाचे आहेत, अशी भावना भाजपचे जिल्हाध्यक्ष शरद बुट्टे पाटील यांनी पत्रकाद्वारे व्यक्त केली. यंदाच्या दिवाळीनिमित्त वितरित होणाऱ्या आनंदाचा शिधा संचात रवा, चणाडाळ, साखर, खाद्यतेलासोबत मैदा आणि पोहे यांचाही समावेश करण्याचा निर्णय राज्य मंत्रिमंडळाच्या बैठकीत झाला असून शिधा पत्रिकाधारकांना 100 रुपयांत 1 किलो साखर, 1 लिटर खाद्यतेल,प्रत्येकी अर्धा किलो रवा, चनाडाळ,मैदा आणि पोहे असा शिधा दि. 25 ते 30 नोव्हेंबरपर्यंत वितरित करण्यात येणार आहे. महायुती सरकारच्या या निर्णयामुळे राज्यातील सणासुदीचे दिवस गोड होणार असून आपत्तीग्रस्त बळीराजालाही दिलासा मिळणार आहे, असे बुट्टे पाटील यांनी प्रसिद्धी पत्रकात म्हटले आहे. जून-जुलै 2023 या दोन महिन्यांच्या कालावधीत झालेल्या अतिवृष्टीमुळे झालेल्या पिकांच्या आणि शेतजमिनीच्या नुकसानीबद्दल राज्य सरकारने 1 हजार 71 कोटी रुपयांचा निधी मंजूर केला असून राज्यातील 14 लाख 9 हजार 318 नुकसानग्रस्त शेतकऱ्यांच्या खात्यात मदतीची रक्कम थेट जमा होणार आहे. यामुळे शेतकऱ्यांना मदतीसाठी सरकार दरबारी खेटे घालावे लागणार नाहीत, अशी माहितीही त्यांनी दिली आहे. यादी, रक्कम संकेतस्थळावर प्रसिद्ध होणार मदत वाटपाची कार्यवाही पूर्ण झाल्यानंतर लाभार्थ्यांची यादी व मदतीची रक्कम याबाबतचा तपशील जिल्हाधिकारी कार्यालयांच्या संकेतस्थळावर प्रसिद्ध करण्यात येईल, असेही बुट्टे पाटील यांनी स्पष्ट केले.
