परिंचे, (वार्ताहर) – श्रीक्षेत्र वीर (ता.पुरंदर) येथे रंगाची उधळण करत दहा दिवस सुरू असलेल्या उत्सवाची सांगता मानकरी समस्त जमदाडे परिवार यांच्या हस्ते श्रीनाथ म्हस्कोबा व देवी जोगेश्वरी यांच्या उत्सव मूर्तींना नैवेद्य दाखवून रंगाचे शिंपन करून पारंपरिक मारामारीने करण्यात आली. यावेळी लाखो भाविकांच्या उपस्थितीत सवाई सर्जाचा जयघोष करत पालख्यां व वीस गावाच्या मानाच्या काट्यावर फुलांची उधळण करत रंगीबेरंगी फटाक्यांची आतषबाजी करुन यात्रेची सांगता करण्यात आली.

मारामारीनिमित्त पहाटे श्रीनाथ म्हस्कोबा व देवी जोगेश्‍वरी यांच्या मूर्तीची महापूजा करण्यात आली. दुपारी बारा वाजता धुपारती होऊन कोडीतची मानाची पालखी प्रथम देऊळवाड्यात आली त्यापाठोपाठ कनेरी, वाई, सोनवडी, भोडवेवाडी, कसबा पेठ (पुणे) या पालख्या व सोहळ्यातील 20 गावच्या वस्त्र धारण केलेल्या मानाच्या काट्या ढोल ताशांसह अबदागिरी, निशान, छत्री, दागिदार व सर्व मानकरी मंदिरात आले.

मानाच्या पालख्या व काट्यांच्या मंदिराला तीन प्रदक्षिणा पूर्ण केल्यानंतर देऊळ वाड्यातील दगडी कासवावर तात्याबा बुरुंगले, दादा बुरुंगले यांची भाकणूक (भविष्यवाणी) सांगण्यात आली. यामध्ये यावर्षी बाजरीचे पीक जोमात येणार असून मृगाचे पाणी चार खंडात पडेल, आश्‍लेषा मघा नक्षत्र दोन खंडात पडेल.

हत्तीचे पाणी चार खंडात पडून जनतेचे समाधान होईल. उतरा, पूर्वा, तीन खंडात पडेल, चौथ्या खंडात साधारण राहील. गायी-गुरे रोगराई हटली आहे, मनुष्याच्या मागे खाता पिता आटापिटा राहिल ज्याची गादी त्याला मिळणार असल्याचे भविष्यवाणीत सांगण्यात आले.

भाकणूकी नंतर दुपारी दीड वाजता देवाचे मानकरी समस्त जमदाडे यांच्यामार्फत देवाला नैवेद्य दाखवून रंगाचे शिंपन करण्यात आले यावेळी फुलांची उधळण व रंगीबेरंगी फटाक्यांची आतषबाजी करण्यात आली.एक मंदिर प्रदक्षिणा पूर्ण करून सर्व पालख्या आपापल्या स्थळी गेल्या.

दहा दिवस सुरू असलेला यात्रा उत्सव पार पाडण्यासाठी देवस्थान ट्रस्टचे अध्यक्ष संतोष धुमाळ, विश्वस्त सचिव अभिजित धुमाळ, विश्वस्त खजिनदार अमोल धुमाळ ट्रस्टचे उपाध्यक्ष रवींद्र धुमाळ, विश्वस्त हनुमंत (बाबुकाका) धुमाळ,नामदेव जाधव, राजेंद्र कुरपड , संजय कापरे, दत्तात्रय समगीर यांनी अथक परिश्रम घेतले.