Cockroach Janata Party :  कॉक्रोच जनता पार्टीने दिल्ली, पुण्यानंतर आता मुख्यमंत्री देवेंद्र फडणवीस यांच्या नागपुरात मोठे आंदोलन करण्याची तयारी सुरू केली आहे. येत्या १६ जून रोजी संविधान चौक येथे आंदोलन करण्यासाठी कॉक्रोच जनता पार्टीच्या नागपुरातील कार्यकर्त्यांनी सीताबर्डी पोलिस ठाण्यात आंदोलनासाठी परवानगी मागितली आहे. यावेळी अनेक युवकांच्या हातात गुलाबाची फुले होती.

पक्षाचे स्थानिक पदाधिकारी दुर्गेश कुडके यांनी सांगितले की, आंदोलनाची प्राथमिक तयारी सुरू करण्यात आली असून मोठ्या संख्येने युवक सहभागी होण्याची शक्यता आहे. पक्षाचे संस्थापक अभिजीत दीपके यांच्याशी या संदर्भात चर्चा झाली असून ते सुद्धा सहभागी होणार आहेत.

आयोजकांच्या दाव्यानुसार, संविधान चौक येथे सुमारे दोन हजार नागरिक आणि युवक आंदोलनात सहभागी होऊ शकतात. सोशल मीडियाच्या माध्यमातूनही युवकांना आंदोलनात सहभागी होण्याचे आवाहन करण्यात येत आहे. परवानगी मिळाल्यास नागपुरातील हे कॉकरोच जनता पार्टीचे तिसरे आंदोलन ठरणार आहे.

नागपुरातील संविधान चौक आंदोलनासाठी प्रसिद्ध आहे. परंतु २ हजार लोकांची गर्दीची अपेक्षा व्यक्त केली जात असली तरी अभिजित दीपकेंच्या दिल्ली, पुणे येथील आंदोलनातील तरुणांची गर्दी बघता २ हजारांपेक्षा अधिक गर्दी होऊ शकते, याकरिता परवानगी देताना पोलिसांना सर्व गोष्टी लक्षात घ्याव्या लागणार आहेत.   Cockroach Janata Party

दरम्यान, ६ जून रोजी दिल्लीत कॉक्रोच जनता पार्टीचे संस्थापक अभिजित दीपके यांच्या नेतृत्त्वात दिल्लीत आंदोलन झाले. त्यानंतर 11 जूनला गुरुवारी अभिजित दीपके यांचे पुण्यात आंदोलन झाले. नागपुरात आंदोलन झाल्यास अभिजित दीपके यांच्या नेतृत्वातील देशातील हे तिसरे तर महाराष्ट्रातील दुसरे आंदोलन ठरणार आहे.

दरम्यान पुण्यात झालेल्या पत्रकार परिषदेत अभिजित दीपके यांनी येत्या २० जून रोजी दिल्लीत आणखी मोठे आंदोलन केले जाईल, अशी माहिती दिली. शिक्षण मंत्री धर्मेंद्र प्रधान यांचा राजीनामा झाल्याशिवाय तिथून माघारी यायचं नाही, असेही दीपके यांनी यावेळी सांगितले. त्यामुळे केंद्र सरकारवर दबाव निर्माण होण्याची शक्यता आहे.

परंतु आता 16 जूनला होणाऱ्या नागपूरमधील या आंदोलनाला मुख्यमंत्र्यांचा गृह विभाग परवानगी देणार की अर्ज फेटाळून लावणार, याकडे अनेकांचे लक्ष लागले आहे. Cockroach Janata Party

हेही वाचा: 

Sanjay Raut: बंगालमधील ईव्हीएमला भाजप सरकारकडून आग; संजय राऊतांचा खळबळजनक आरोप