Cockroach Janata Party – कॉक्रोच जनता पार्टीने (सीजेपी) दिल्लीच्या जंतर-मंतर परिसरातील आंदोलन रविवारी दुसऱ्या दिवशीही सुरू ठेवले. आंदोलनस्थळी बोलताना सीजेपीचा संस्थापक अभिजीत दिपके याने आंदोलनाला पाठिंबा देण्याचे आवाहन शेतकऱ्यांना केले.

नीट आणि इतर परीक्षांच्या गोंधळाबद्दल केंद्रीय शिक्षण मंत्री धर्मेंद्र प्रधान यांनी राजीनामा द्यावा, या मागणीसाठी सीजेपीने जंतर-मंतर परिसरात पुन्हा आंदोलन हाती घेतले. त्या आंदोलनाला शनिवारी सायंकाळपर्यंतचीच परवानगी दिल्ली पोलिसांनी दिली होती.

त्यामुळे आंदोलनस्थळ सोडण्याची सूचना पोलिसांनी आंदोलकांना केली. मात्र, आंदोलनाचा परिसर न सोडण्याचा निर्धार सीजेपीने केला. दिपके आणि अनेक आंदोलकांनी रात्रभर त्या परिसरात ठिय्या दिला.

आंदोलनाच्या दुसऱ्या दिवशी दिपके याने नीट फेरपरीक्षा दिलेल्या विद्यार्थ्यांनाही आंदोलनस्थळी येण्याचे आवाहन केले. शेतकऱ्यांनी त्यांच्या हक्कांसाठी लढा दिला. त्यावेळी विद्यार्थ्यांनी शेतकऱ्यांना साथ दिली. आता विद्यार्थ्यांना शेतकऱ्यांच्या पाठिंब्याची गरज आहे, अशी भूमिकाही त्याने मांडली.

तसेच, आंदोलनस्थळी येणाऱ्यांना न रोखण्याची विनंती पोलिसांना केली. प्रधान जोपर्यंत राजीनामा देत नाहीत; तोपर्यंत आंदोलनस्थळ सोडणार नाही, अशी भूमिका सीजेपीने लावून धरली आहे.