Hamam al-Hamami : फ्लाय दुबईच्या विमानात कॅप्टन स्मित मछार यांच्यावर चाकूने हल्ला करून दुबई-तेल अवीव विमान पाडण्याचा कथित प्रयत्न करणाऱ्या सहवैमानिकाची ओळख पटली असून, त्याच्याविषयी धक्कदायक माहिती समोर आली आहे. यामुळे आता या प्रकरणाला नवं वळण लागण्याची शक्यता आहे.

एका इंग्रजी दैनिकाने दिलेल्या वृत्तानुसार, सहवैमानिकाला यापूर्वीच ओमानमध्ये उड्डाण करण्यास बंदी घालण्यात आली होती. त्याच्या वैचारिक भूमिकेबाबत निर्माण झालेल्या चिंतेमुळे ओमानी अधिकाऱ्यांनी ही कारवाई केली होती. चौकशीतून ही माहिती समोर आली असून, या सहवैमानिकाचे नाव हमाम अल-हमामी असल्याचे समोर आले आहे.

हमामीची विचारसरणी सुरुवातीपासूनच कट्टरपंथी होती. तो इस्राइलला शत्रू मानत होता तर पॅलेस्टाईनबद्दल सहानुभूती व्यक्त करत होता. तो केवळ आठ महिन्यांपूर्वीच फ्लाय दुबईमध्ये सामील झाला होता. हमामीच्या अटकेनंतर त्याच्या बॅगेतून ‘फ्री पॅलेस्टाईन’च्या पत्रकांसह विविध वस्तू जप्त करण्यात आल्या आहेत. यामधून आणखी धक्कादायक खुलासा होण्याची शक्यता वर्तवली जात आहे.

या संपूर्ण प्रकरणावर इस्रायलचे पंतप्रधान बिन्यामिन नेतन्याहू यांनी प्रतिक्रिया दिली. त्यांनी सहवैमानिकावर ‘इस्लामवादी कट्टरतावादी विचारांचे प्रशिक्षण’ घेतल्याचा आरोप केला आहे. तसेच तो आत्मघातकी मानसिकतेचा दिसत असल्याचंही म्हटलं आहे.

नेमकी घटना कशी घडली ?

३० सप्टेंबर २०२६ रोजी फ्लाय दुबईचे FZ1073 विमान दुबईहून तेल अवीवच्या दिशेने जात होते. विमान सुमारे ३४ हजार फूट उंचीवर असताना कॉकपिटमध्ये भारतीय कॅप्टन स्मित मच्छार यांच्यावर सहवैमानिकाने चाकूने प्राणघातक हल्ला केला. जखमी अवस्थेतही कॅप्टन स्मित मच्छार यांनी कॉकपिटचा दरवाजा उघडण्यात यश मिळवले.

त्यानंतर विमानातील प्रवासी आणि इतर क्रू सदस्यांनी हस्तक्षेप करून हल्लेखोराला नियंत्रणात घेतले.  विमानाचे सौदी अरेबियातील तबूक येथे सुरक्षितपणे आपत्कालीन लँडिंग करण्यात आले. विमानातील सर्व प्रवासी सुरक्षित असल्याचे अधिकाऱ्यांनी सांगितले. या विमानात १७४ प्रवासी आणि विमान कर्मचारी होते.

कॅप्टन स्मित मच्छार यांच्या धाडसाचे कौतुक

या घटनेत गंभीर जखमी झालेले कॅप्टन स्मित मच्छार यांच्यावर सध्या उपचार सुरू आहेत. या संपूर्ण घटनेत त्यांनी दाखवलेल्या धैर्याचे कौतुक होत आहे. पंतप्रधान नरेंद्र मोदी यांनीही मच्छार यांच्याशी व्हिडिओ कॉलद्वारे संवाद साधून त्यांच्या प्रकृतीची विचारपूस केली आणि त्यांच्या धैर्याचे कौतुक केले.

संबंधित सुरक्षा आणि गुप्तचर यंत्रणांकडून तपास सुरू

दरम्यान, सहवैमानिकाचा नेमका हेतू काय होता, त्याची पूर्वीची पार्श्वभूमी काय होती आणि विमान पाडण्याचा हा पूर्वनियोजित प्रयत्न होता का, याचा तपास संबंधित सुरक्षा आणि गुप्तचर यंत्रणांकडून सुरू आहे. त्यामुळे या प्रकरणातून आणखी कोणती माहिती समोर येते, याकडे आता लक्ष लागले आहे.  इस्रायल, यूएई आणि सौदी अरेबियातील संबंधित यंत्रणा या प्रकरणाचा तपास करत असल्याची माहिती आहे.

Nusrat Bharucha : ऑक्सिजन सपोर्टवर नुसरत भरुचा; एअर अॅम्ब्युलन्सने मुंबईत परतली, चिंता वाढवणारा व्हिडिओ समोर