CJP:  परीक्षेच्या पेपरफुटीच्या आरोपांविरोधात जंतर मंतरवर झालेल्या देशव्यापी आंदोलनादरम्यान एक प्रमुख आवाज म्हणून उदयास आलेली कॉकरोच जनता पार्टी आज आपल्या भविष्यातील रणनीती आणि देशव्यापी विस्ताराबाबत एक मोठी घोषणा करणार आहे.

CJP चे प्रवक्ते आशुतोष रांका यांनी एका व्हिडिओ संदेशात  ही माहिती दिली. दरम्यान याविषयी बोलताना त्यांनी, “संघटनेचे नेतृत्व गेल्या दोन दिवसांपासून महाराष्ट्रातील छत्रपती संभाजीनगर याठिकाणी आंदोलनाच्या पुढील टप्प्याची आखणी करत आहे.” असे म्हटले आहे.

पुढे त्यांनी सांगितले की, देशात व्यवस्थेतील बदलासाठी एक मोठी लढाई सुरू झाली आहे आणि लोकांनी या आंदोलनावर मोठ्या आशा ठेवल्या आहेत.

सोशल मीडियावर मिळालेल्या सूचनांवर आधारित रणनीती   (CJP)

आशुतोष रांका यांनी सांगितले की, “संघटनेची रणनीती तयार करण्यापूर्वी, इंस्टाग्राम, व्हॉट्सॲप आणि इतर सोशल मीडिया प्लॅटफॉर्मवरून समर्थकांकडून मिळालेल्या हजारो सूचना आणि संदेशांचे पुनरावलोकन करण्यात आले. या सर्व सूचनांवर चर्चा केल्यानंतर, नेतृत्वाने आपली रणनीती अंतिम केली आहे. त्यांनी सांगितले की, आंदोलनाची भविष्यातील दिशा आणि पुढील पावलांबाबत सविस्तर घोषणा गुरुवारी केली जाईल.” असेही त्यांनी यावेळी सांगितले.

सात तासांच्या बैठकीत विस्तार योजनांवर चर्चा    (CJP)

या घोषणेपूर्वी, छत्रपती संभाजीनगर याठिकाणी सीजेपीचे संस्थापक अभिजित दीपके यांच्या निवासस्थानी सात तासांची धोरणात्मक बैठक झाली. या बैठकीत देशभरात संघटनेची उपस्थिती मजबूत करणे, विद्यार्थी संघटनांचे राष्ट्रीय जाळे तयार करणे आणि विविध राज्यांमधील शिक्षण-संबंधित चळवळींना पाठिंबा देण्यावर एकमत झाले.

निवडणुका लढवणार नाही, दबाव गट म्हणून काम करेल

राष्ट्रीय विद्यार्थी दबाव गट म्हणून आपली भूमिका विस्तारण्यावर आणि शिक्षण सुधारणेला आपल्या अजेंड्याच्या केंद्रस्थानी ठेवण्यावरही बैठकीत चर्चा झाली. सीजेपी निवडणूक राजकारणात प्रवेश करणार नाही आणि सामाजिक व सार्वजनिक हितांवर लक्ष केंद्रित करणारा दबाव गट म्हणून काम करत राहील, असा निर्णय नेतृत्वाने घेतला.

बैठकीनंतर अभिजित दीपके म्हणाले, “आज आपण भविष्यातील कृती योजनेवर चर्चा करण्यासाठी येथे जमलो आहोत. देशाच्या इतर भागांमध्ये आपण कसे आणि कुठे योगदान देऊ शकतो याचा विचार करू. आम्ही राजकीय पक्ष स्थापन करण्याचा विचार करत नाही. देशातील जनतेचा न्यायपालिका, राजकारणी आणि संपूर्ण व्यवस्थेवरील विश्वास उडाला आहे. आम्ही एक दबाव गट म्हणून काम करू.”

शिक्षण सुधारणा हा आंदोलनाचा मुख्य अजेंडा असेल   (CJP)

सभेत उपस्थित असलेल्या नेत्यांनी सांगितले की, संघटना केवळ शिक्षण-संबंधित मुद्द्यांवर लक्ष केंद्रित करेल. या मुद्द्यांमध्ये परीक्षा पद्धतीत सुधारणा, पारदर्शकता, उत्तरदायित्व, विद्यार्थी कल्याण आणि शिक्षण व्यवस्था मजबूत करणे यांचा समावेश आहे.

हे आंदोलन गांधी आणि आंबेडकरांच्या तत्त्वांवर आधारित असेल

महात्मा गांधी आणि डॉ. भीमराव आंबेडकर यांच्या तत्त्वांवर आधारित हे आंदोलन पुढे नेण्याचा निर्णयही नेतृत्वाने घेतला. अहिंसक आणि लोकशाही मार्गाने आंदोलन सुरू ठेवण्याची आणि पारंपरिक राजकीय पक्षांपासून स्वतंत्र राहण्याची आपली वचनबद्धता संघटनेने पुन्हा एकदा व्यक्त केली.