Chinchwad Station – पिंपरी-चिंचवड शहरातील चिंचवड रेल्वे स्टेशन परिसरातील एसटीचा अधिकृत थांबा सध्या एसटीसाठी नव्हे, तर खासगी अवैध प्रवासी वाहतूक करणाऱ्या जीप व कार चालकांसाठीच असल्याचे चित्र दिसून येत आहे. सार्वजनिक वाहतुकीसाठी राखीव असलेली जागा बिनधास्तपणे खासगी वाहनांनी व्यापल्याने एसटी प्रवासी अक्षरशः वाऱ्यावर सोडले गेले असून, प्रशासनाच्या भूमिकेवर प्रश्नचिन्ह उपस्थित झाले आहे.

चिंचवड स्टेशन परिसर हा शहरातील प्रमुख वाहतूक केंद्र मानला जातो. दररोज हजारो प्रवासी एसटी बससेवेचा वापर करतात. मात्र, एसटी थांब्याच्या अगदी समोर आणि बस ये-जा करण्याच्या मार्गातच खासगी जीप-कार उभ्या राहत असल्याने एसटी बसना थांबण्यासाठी जागाच उरलेली नाही. परिणामी अनेक वेळा बस रस्त्याच्या मधोमध उभी राहत असून, प्रवाशांना धोकादायक परिस्थितीत चढ-उतार करावा लागत आहे. या परिसरात खासगी वाहन चालक उघडपणे एसटीचे प्रवासी पळवत असल्याचे वास्तव आहे.

‘जलद, थेट प्रवास’ अशा आमिषाने प्रवाशांना जीप-कारमध्ये बसवले जाते. परिवहन विभागाने एसटी थांब्‍याच्‍या परिसरात उभ्‍या राहणाऱ्या अवैध प्रवासी वाहतुकीवर कारवाईची घोषणा केली. मात्र पिंपरी चिंचवड शहरात ही घोषणा कागदावरच राहिली. वाहतूक पूर्णपणे अवैध असतानाही संबंधित यंत्रणा कारवाईपासून दूर असल्याचा आरोप केला जात आहे. वाहतूक नियंत्रणासाठी तैनात असलेले अधिकारी केवळ बघ्याची भूमिका बजावत असल्याची भावना नागरिकांमध्ये आहे.

याबाबत दैनिक प्रभातच्या पाहणी केली असता एसटी बसांसाठी केवळ मर्यादित पट्टा उपलब्ध असून, तब्बल १० ते १५ मीटरपर्यंतचा परिसर खासगी वाहनांनी व्यापलेला आहे. बसचालकांना अरुंद जागेतून बस वळवताना मोठी कसरत करावी लागत असून, एखाद्या क्षणी मोठा अपघात होण्याची भीती व्यक्त केली जात आहे.

प्रवाशांचा त्रास, सुरक्षिततेचा प्रश्न ऐरणीवर
या गोंधळाचा सर्वाधिक फटका महिला, ज्येष्ठ नागरिक, दिव्यांग आणि ग्रामीण भागातून येणाऱ्या प्रवाशांना बसत आहे. बस कुठे थांबेल, कुठून निघेल याचा अंदाज लागत नसल्याने प्रवाशांमध्ये संभ्रम निर्माण होत आहे. वाहनांची गर्दी, हॉर्नचा गोंगाट आणि बेशिस्त पार्किंगमुळे स्टेशन परिसर अपघातप्रवण बनला आहे.

कारवाईची मागणी
एसटी थांबा तातडीने अतिक्रमणमुक्त करावा, खासगी अवैध प्रवासी वाहतुकीवर कठोर कारवाई करावी, तसेच येथे कायमस्वरूपी वाहतूक पोलीस व एसटी प्रशासनाचा संयुक्त बंदोबस्त तैनात करावा, अशी मागणी प्रवासी व स्थानिक नागरिकांकडून होत आहे. सार्वजनिक वाहतुकीसाठी असलेली जागा खासगी स्वार्थासाठी वापरली जात असेल, तर ‘सार्वजनिक व्यवस्था’ हा शब्दच अर्थहीन ठरेल, अशी संतप्त प्रतिक्रिया नागरिक व्यक्त करत आहेत.