चंद्रपूर – पैसे व खाऊ घेऊन देण्याचे आमिष दाखवून दोन नराधमांनी अल्पवयीन मुलींवर वारंवार अत्याचार केल्याची माणुसकीला काळीमा फासणारी घटना चिमुर शहरात उघडकीस आली. रात्री साडेदहाच्या सुमारास चिमुर पोलिस ठाण्यात तक्रार दाखल करून दोन्ही आरोपींवर कठोर कारवाई करण्याची मागणी करण्यात आली आहे. दरम्यान या प्रकारामुळे संतप्त झालेल्या नागरिकांनी पोलिसांवर दगडफेक केली तर पोलिसांनी जमावाला पांगविण्यासाठी लाठीमार केला. जमावाचा रोष बघता आरोपींनी पोलिस ठाण्यात शरण घेतली. संतप्त झालेल्या जमावाने पोलिस ठाण्याला चार तास घेराव घालून आरोपींना फाशीची शिक्षा देण्याची मागणी केली. रात्री तिन वाजेपर्यंत चिमुर शहरात प्रचंड तणावपूर्ण स्थिती होती. सध्या शहरात तणावपूर्ण शांतता असून पोलिसांचा चोख बंदोबस्त तैनात करण्यात आला आहे. अधिक माहितीनुसार, चिमुर शहरातील एका वार्डातील एक 13 व 10 वर्षाच्या दोघी मैत्रिणीं होत्या. त्या सोबत शिक्षण घेत होत्या. शेजारी राहत असल्याने घरासमोर नेहमी खेळायच्या. सोमवारी एका 13 वर्षाच्या मुलीने रात्री साडेआठच्या सुमारास घरी असताना आपल्या आईला दोघींसोबत घडलेल्या अत्याचाराच्या प्रकाराची माहिती दिली. मार्च महिन्यात दोघी मैत्रीणी दुपारच्या सुमारास घरासमोर खेळत असताना परिसरात राहणारा आरोपी रसिद रूस्तम शेख (नड्डेवाला) याने खाऊ देण्याच्या बहाण्याने घरी बोलवले. दोघी मुली घरी गेल्यानंतर त्यांचेवर आळीपाळीने अत्याचार केला. त्यानंतर दुसऱ्या दिवशी दुसरा आरोपी नसिर वजीर शेख (गोलावाला) यानेही त्या दोघींना खाऊ देण्याच्या बहाण्याने घरी बोलावले व दोघींवर अत्याचार केला. परिस्थिती नियंत्रणात; तणावपूर्ण शांतता पोलिस अधीक्षक व अप्पर पोलिस अधीक्षक, विविध पथकांसह रात्री तिनच्या सुमारास चिमुर पोलिस ठाण्यात दाखल झाले. आणि चोख पोलिस बंदोबस्त तैनात करण्यात आला. दंगा नियंत्रण पथकाने परिस्थीती हाताळल्याने तणावपूर्ण परिस्थिती हळूहळू नियंत्रणात आली. आता चिमुर शहरात परिस्थिती नियंत्रणात असून तणावपूर्ण शांतता आहे. आरोपी आणि पीडीताच्या घराशेजारी, तसेच शहरात ठिकठिकाणी चोख पोलिस बंदोस्त लावण्यात आला आहे.
