नवी दिल्ली  – पुढील वर्षी होणाऱ्या लोकसभा निवडणुकीची सेमी-फायनल म्हणून पाच राज्यांतील विधानसभा निवडणुकांकडे पाहिले जात आहे. त्या निवडणुकांच्या मतदानाची प्रक्रिया उद्यापासून (मंगळवार) सुरू होणार आहे. त्यानुसार, मिझोरममधील सर्व जागांसाठी, तर छत्तिसगढमध्ये पहिल्या टप्प्यासाठी मतदान होईल.

मिझोरममध्ये विधानसभेच्या एकूण 40 जागा आहेत. त्यासाठी एकूण 174 उमेदवार नशीब आजमावत आहेत. त्यांचे भवितव्य सुमारे 8.57 लाख मतदार ठरवतील. छत्तिसगढमध्ये दोन टप्प्यांत मतदान होणार आहे. त्या राज्यात विधानसभेच्या एकूण 90 जागा आहेत. पहिल्या टप्प्यात 20 जागांसाठी मतदान होईल. त्यामुळे 223 उमेदवारांचे भवितव्य इलेक्‍ट्रॉनिक मतदान यंत्रांमध्ये बंद होईल.

छत्तिसगढमध्ये पहिल्या टप्प्यात मतदानाचा हक्क बजावण्यासाठी सुमारे 40 लाख मतदार पात्र आहेत. मतदानानंतर निकालासाठी मोठी प्रतीक्षा करावी लागणार आहे. मध्यप्रदेश, राजस्थान आणि तेलंगणातही विधानसभा निवडणुकांची प्रक्रिया सुरू आहे. त्या राज्यांत वेगवेगळ्या दिवशी मतदान होणार आहे.

त्यानंतर पाचही राज्यांत एकाच दिवशी म्हणजे 3 डिसेंबरला मतमोजणी होईल. त्या निकालांनंतर अवघ्या पाच महिन्यांनी लोकसभा निवडणूक होईल. त्यामुळे विधानसभा निवडणुकांच्या निकालांना मोठे महत्व प्राप्त होणार आहे.