सिल्लोड : तालुक्यात शनिवारी दुपारी दोनच्या सुमारास वीज पडून 4 जणांचा मृत्यू झाला. तर एक जण जखमी झाला. यात एका महिलेसह दोन सख्ख्या भावांचा समावेश आहे. सारोळा शिवारात वीज पडून सख्खे भाऊ ठार झाले. तर पिंपळदरी शिवारात सख्ख्या भावांवर वीज पडली. यात एक भाऊ ठार झाला. तर एक भाऊ जखमी झाला. मोढा बु. शिवारात वीज पडून महिला ठार झाली. त्याचप्रमाणे खातखेडा शिवारात शेजारी वीज पडल्याने एक तरुण बेशुद्ध पडला. सिल्लोड तालुक्यात दुपारी दोन वाजेच्या सुमारास विजेच्या कडकडाटासह जोरदार पाऊस झाला. रात्री तालुक्यात काही भागात मृगाचा पाऊस झाल्याने पेरणीच्या कामांनी वेग घेत होता. शेतात काम करीत असताना वेगवेगळ्या ठिकाणी विजा पडल्या. यात सारोळा शिवारात वीज पडून यश राजू काकडे (वय १४), रोहित राजू काकडे (वय २१) या दोन सख्ख्या भावांचा मृत्यू झाला. हे दोघे भाऊ शेतात मका पेरणीचे काम करीत होते. पाऊस आल्याने ते झाडाखाली थांबले. या दरम्यान वीज पडली. त्यांची आजी आणि आई दुसऱ्या एका झाडाखाली थांबल्याने त्या बचावल्या. पिंपळदरी शिवारात शेतात काम करीत असताना दोन सख्ख्या भावांवर वीज पडली. यात शिवाजी सतीश गव्हाणे (वय ३१) याचा मृत्यू झाला. तर जीवन सतीश गव्हाणे (वय २०) जखमी झाला. जखमी जीवन गव्हाणे यांच्यावर खाजगी रुग्णालयात उपचार सुरू आहेत. मोढा बु. शिवारात वीज पडल्याने रंजना बापुराव शिंदे (वय ४७) या महिलेचा मृत्यू झाला. खातखेडा शिवारात विशाल ज्ञानेश्वर शिंदे (वय २०) या तरुणाच्या शेजारी वीज पडल्याने बेशुद्ध झाला. त्याच्यावर सिल्लोड येथील खासगी रुग्णालयात उपचार सुरू आहेत. मृतांवर सिल्लोड उपजिल्हा रुग्णालयात शवविच्छेदन करुन सायंकाळी शोककुल वातावरणात अंत्यसंस्कार करण्यात आले.
