Amol Kolhe । Chhaava movie controversy – छावा हा छत्रपती संभाजी महाराज यांच्या जीवनावर आधारित चित्रपट लवकरच प्रेक्षकांच्या भेटीला येत आहे. या चित्रपटात अभिनेता विक्की कौशल आणि अभिनेत्री रश्मिका मंदाना यांची प्रमुख भूमिका आहे.

नुकताच या सिनेमाचा ट्रेलरही प्रदर्शित झाला आहे. दरम्यान, ट्रेलरमध्ये गाण्याची काही दृश्य दाखवली आहेत. छत्रपती संभाजी महाराज आणि महाराणी येसूबाई यांना एकत्र नृत्य करताना दाखवले आहे. त्या नृत्यावरूनच आता वाद सुरु झालाय.

छावा संघटना तसेच मराठा क्रांती मोर्चाने या चित्रपटाला विरोध दर्शवला आहे, तर माजी खासदार युवराज संभाजीराजे छत्रपती यांनी देखील यावर नाराजी व्यक्त करत आपली भूमिका मांडली आहे.

तर, दुसरीकडे शरद पवार गटाचे नेते डॉ. अमोल कोल्हे यांनी मात्र सिनेमाच्या ट्रेलरला पाठिंबा दर्शवला असल्याचं दिसून येत आहे. माध्यमांशी बोलताना डॉ. अमोल कोल्हे म्हणाले की, “फक्त ट्रेलर पाहून नेमकं सिनेमात काय आहे याचा पूर्ण अंदाज बांधणं कठीण आहे. त्यामुळे जेवढं सिनेमाच्या ट्रेलरमध्ये पाहिलं असता यामध्ये छत्रपती संभाजी महाराज आणि महाराणी येसूबाई लेझीम नृत्य करताना दिसून येत आहे.

हा आपला पारंपरिक नृत्य प्रकार असून, नेमकं सिनेमात त्या प्रसंगाची पेरणी का करण्यात आली आहे? त्याचा उद्देश काय? हे आपल्याला चित्रपट पाहिल्याशिवाय कळणार नाही. आणि माझं प्रामाणिक मत असं आहे छत्रपती संभाजी महाराजांचा गौरवशाली इतिहास समोर आणत असताना स्वराजरक्षक संभाजी मालिकेतून त्या ऐतिहासिक व्यक्तिरेखेला आणि इतिहासाला कुठं ही गालबोट लागणार नाही याची संपूर्ण काजळी आमच्या टीमने घेतली होती.

आणि त्याच पद्धतीने माझी ही अपेक्षा आहे, छावा सिनेमाच्या संपूर्ण टीमने सुद्धा छत्रपती संभाजी महाराजांच्या त्या इतिहासाला कुठंही गालबोट न लावता आणि इतिहासाची कोणतेही तोडमोड न करता चित्रपट समोर आणला असेल. आणि जर ही अपेक्षा पूर्ण झाली असेल तर, मला वाटतंय इतर कोणत्याही छोट्या गोष्टीवरून वाद निर्माण करायला नको.

आपला इतिहास हिंदी सिनेमाच्या माध्यमातून संपूर्ण जग भर जात असेल तर ही आपल्यासाठी खूप मोठी गोष्ट आहे. आणि त्यासाठी आपण स्वतः पाठिंबा दिला पाहिजे.’ असं अमोल कोल्हे यावेळी म्हणाले आहेत. त्यांचा हा व्हिडिओ देखील सोशल मीडियावर व्हायरल होत आहे.

दरम्यान, ‘छावा’ सिनेमा येत्या १४ फेब्रुवारीला सर्वत्र प्रदर्शित होणार आहे. या सिनेमात विकी कौशल छत्रपती संभाजी महाराजांच्या भूमिकेत आहे. तर रश्मिका मंदाना महाराणी येसूबाईंची भूमिका साकारणार आहे. संतोष जुवेकर, सुव्रत जोशी या मराठी कलाकारांचीही सिनेमात वर्णी लागली आहे. लक्ष्मण उत्तेकर यांनी या सिनेमाचं दिग्दर्शन केलं आहे.