Chakan News – चाकण शहरात अलीकडेच भटक्या कुत्र्यांच्या हल्ल्यात एका महिलेचा मृत्यू झाल्याच्या पार्श्वभूमीवर नगरपरिषद प्रशासनाने तातडीने दखल घेत विविध स्तरांवर कठोर उपाययोजना सुरू केल्या आहेत. घटनेनंतर आंबेठाण पूल व मार्केट यार्ड परिसरात शोधमोहीम राबवून हल्ला करणारे भटके कुत्रे पकडण्यात आले असून त्यांना नगरपरिषदेच्या निवारा केंद्रात ठेवण्यात आले आहे. सध्या त्यांच्या वैद्यकीय तपासणी व उपचाराची प्रक्रिया सुरू आहे. शहरातील भटक्या कुत्र्यांची वाढती संख्या लक्षात घेता निर्बीजीकरण व रेबीज लसीकरण मोहीम सातत्याने राबविण्यात येत आहे. तसेच आक्रमक किंवा पिसाळलेल्या कुत्र्यांची माहिती मिळताच त्वरित कृती दल घटनास्थळी पोहोचून त्यांना पकडत आहे. यासोबतच मोकाट जनावरे पकडण्याची मोहीम अधिक गतीने राबविण्यात येत असून सुरक्षेच्या दृष्टीने संबंधित भागात विद्युत पथदिवे व सीसीटीव्ही कॅमेरे बसविण्याचा निर्णय घेण्यात आला आहे. सीसीटीव्हीच्या माध्यमातून शहरात उघड्यावर कचरा टाकणार्यांवर देखरेख ठेवली जाणार आहे. उघड्यावर कचरा टाकण्याच्या वाढत्या घटनांमुळे मोकाट जनावरांचे प्रमाण वाढत असल्याचे प्रशासनाच्या निदर्शनास आले आहे. विशेषतः काही हॉटेल चालक व चिकन विक्रेत्यांकडून कचरा टाकला जात असल्याने आरोग्य विभागाकडून अशा व्यावसायिकांवर लक्ष ठेवून दंडात्मक कारवाई सुरू करण्यात आली आहे. वारंवार नियमांचे उल्लंघन करणार्यांविरुद्ध यापुढे थेट फौजदारी गुन्हे दाखल करण्यात येणार असल्याचे स्पष्ट करण्यात आले आहे. दरम्यान, बुधवारी (दि. 18) सार्वजनिक बांधकाम विभागाच्या मोकळ्या मैदान परिसरात वारंवार सूचना देऊनही उघड्यावर कचरा टाकताना आढळून आल्याने रामबहादुर परिहार (रा. चाकण) यांच्याविरुद्ध फौजदारी गुन्हा दाखल करण्यात आला आहे. शहर स्वच्छ व सुरक्षित ठेवण्यासाठी अशा कारवाया अधिक तीव्र करण्यात येणार असून नागरिकांनी उघड्यावर कचरा टाकू नये तसेच इतरांनाही तसे करण्यापासून रोखावे, असे आवाहन नगरपरिषदेकडून करण्यात आले आहे.
