Chakan Accident- कंपनीमध्ये अवजड लोखंडी पोल उचलण्यासाठी कोणतीही सुरक्षित व्यवस्था व क्रेन ऑपरेटर उपलब्ध न केल्याने कामगारावर साडेतीन टन वजनाचा पोल पडून तो गंभीर जखमी झाला. ही घटना चाकण येथे २९ सप्टेंबर रोजी सकाळी ११ ते ११.३० वाजेच्या सुमारास नाणेकरवाडी येथील वेलॉक्स इन्फ्रास्ट्रक्चर प्रा. लि. कंपनीत घडली. याप्रकरणी कंपनीच्या प्लांट हेडसह तिघांवर गुन्हा दाखल करण्यात आला आहे. स्वप्निल सुरेश जाधव (वय ३५, व्यवसाय – प्लांट हेड, रा. वेलॉक्स इन्फ्रास्ट्रक्चर प्रा. लि.,

नाणेकरवाडी, ता. खेड, जि. पुणे), निरंजन सरत नायक (वय ४२, व्यवसाय – कॉन्ट्रॅक्टर/सुपरवायझर, रा. मयूर यादव यांची खोली, डी. के. चौक ते निघोजे रोड, निघोजे, ता. खेड, जि. पुणे; मूळ रा. ओडिशा) व योगेश महादेव आमले (वय अंदाजे ४७, पत्ता माहीत नाही) यांच्याविरुद्ध गुन्हा दाखल झाला आहे. याप्रकरणी सहाय्यक पोलीस निरीक्षक राहुल नागनाथ पाटील (वय ४५, यांनी चाकण दक्षिण पोलीस ठाण्यात फिर्याद दिली आहे.

पोलिसांनी दिलेल्या माहितीनुसार, जखमी कामगार मोनू शर्मा आणि त्याचा सहकारी अभिषेक महतो हे क्रेन नंबर १ येथे काम करत असताना त्यांच्याकडून साडेतीन टन वजनाचा अवजड लोखंडी पोल उचलून घेण्याचे काम सुरू होते. मात्र त्यासाठी पुरेसे मनुष्यबळ, सुरक्षित लिफ्टिंग व्यवस्था, स्वतंत्र क्रेन ऑपरेटर अथवा पोल पलटी करण्यासाठीची आवश्यक साधनसामग्री पुरवण्यात आली नव्हती.

अशा निष्काळजीपणामुळे कामगारांचा जीव जाऊ शकतो याची जाणीव असतानाही आरोपींनी सुरक्षेची कोणतीही उपाययोजना केली नाही. त्यामुळे मोनू शर्मा यांच्या अंगावर अवजड पोल पडून ते गंभीर जखमी झाले. याप्रकरणी दक्षिण चाकण पोलीस ठाणे पुढील तपास करत आहे.