प्रभात वृत्तसेवा
पुणे – केंद्रीय माध्यमिक शिक्षक मंडळाने (सीबीएसई) पुढील वर्षाच्या १०वी आणि १२वीच्या बोर्डाच्या परीक्षेच्या तारखा जाहीर केल्या आहेत. २०२६ मध्ये होणाऱ्या या परीक्षांसाठी भारतासह २६ विविध देशांमधून सुमारे ४५ लाख विद्यार्थी परीक्षा देणार आहेत. दहावी आणि बारावीच्या नियमित परीक्षा १७ फेब्रुवारीपासून सुरू होणार आहेत. विद्यार्थ्यांना परीक्षेच्या तारखा लवकर समजाव्यात आणि त्यांना अभ्यासाचे नियोजन करणे सोपे जावे यासाठी हे वेळापत्रक सहा महिने आधीच जाहीर करण्यात आल्याचे सीबीएसईकडून स्पष्ट करण्यात आले आहे.

दहावीची परीक्षा १७ फेब्रुवारी २०२६ला गणित या विषयाने सुरू होणार असून बारावीसाठी बायोटेक्नॉलॉजी, आंत्रप्रेन्युअरशिप, शॉर्टहँड या तीन विषयांचे पेपर सुरुवातीला होतील. दहावीची नियमित परीक्षा ९ मार्चला संपणार आहे. बारावीची परीक्षा ९ एप्रिलपर्यंत चालणार आहे. या परीक्षेतील एखादा पेपर झाल्यानंतर १० दिवसांनी त्याच्या उत्तरपत्रिका तपासण्याचे काम सुरू होणार असून त्यापुढील १२ दिवसांत ते पूर्ण केले जाणार आहे.

सीबीएसई दहावीची परीक्षाही वर्षातून दोन वेळा..
सीबीएसईने दहावीतील विद्यार्थ्यांना आपले गुण सुधारण्यासाठी आणखी एक संधी देण्याचा निर्णय घेतला असून या निर्णयानुसार आता सीबीएसईची दहावीची परीक्षा २०२६ पासून वर्षातून दोन वेळा होणार आहे. दहावीची अतिरिक्त परीक्षा ही १५ मे पासून नियोजित आहे. पहिल्या परीक्षेत उत्तीर्ण झालेले किंवा एक-दोन विषयांत अनुत्तीर्ण झालेल्या विद्यार्थ्यांनाच ही दुसरी परीक्षा देता येईल.

दहावीच्या उत्तीर्ण विद्यार्थ्यांसाठीही गुण सुधारण्याकरीता दुसऱ्यांदा परीक्षा देता येइल, दुसऱ्या परीक्षेत विद्यार्थी जास्तीत जास्त तीन विषयांची निवड करू शकतात. ही निवड गणित, विज्ञान, सामाजिक शास्त्रे आणि एक भाषा या विषयांच्या गटातून करावी लागेल. ही दुसरी परीक्षा सर्व विषयांसाठी होणार नाही. मात्र फेब्रुवारी महिन्यातील परीक्षेत तीन किंवा त्यापेक्षा जास्त विषयांत अनुत्तीर्ण झालेल्या विद्यार्थ्यांना दहावीचे वर्ष पुन्हा द्यावे लागेल. ही परीक्षा १ जूनला संपेल.