Cancer Medicine Prices: कर्करोगाच्या रुग्णांसाठी दिलासादायक बातमी आहे. राष्ट्रीय औषध मूल्यनिर्धारण प्राधिकरणाने (NPPA) कर्करोगाच्या ५४३ औषधांच्या ब्रँड आणि पॅकच्या कमाल किरकोळ किमतींमध्ये बदल केला आहे. यापैकी ३९७ औषधांच्या किमती कमी झाल्या असून, नव्या किमती ९ नोव्हेंबरपासून लागू होणार आहेत.

या निर्णयानुसार, २१७ औषधांच्या किमती निम्म्याहून अधिक कमी झाल्या आहेत. तर काही औषधांच्या किमतींमध्ये ७० ते ९० टक्क्यांहून अधिक कपात करण्यात आली आहे.

८० हजारांचे इंजेक्शन आता ७ हजारांत Cancer Medicine Prices: 

या निर्णयाचा सर्वाधिक फायदा सॅमटेपा (थायोटेपा १०० मिलीग्राम इंजेक्शन) या औषधाच्या किमतीत झालेल्या कपातीमुळे दिसून येतो. या इंजेक्शनची किंमत ८०,०७१ रुपयांवरून ७,१५० रुपयांपर्यंत कमी झाली आहे.

तसेच, पॅलबोप्रो या औषधाच्या २१ कॅप्सूलच्या पॅकची किंमत ४०,४२१ रुपयांवरून २,७२० रुपये करण्यात आली आहे. मात्र, यादीतील १४६ औषधांच्या किमतींमध्ये कोणताही बदल झालेला नाही.

काही महागड्या औषधांच्या किमती कायम

किमती कमी झाल्या असल्या, तरी काही महागड्या कर्करोगविरोधी औषधांच्या किमती कायम आहेत. यामध्ये कीट्रुडा, रिबोसायक्लिब, टॅग्रिसो, टेसेंट्रिक, डार्झालेक्स आणि इम्फिंझी यांसारख्या औषधांचा समावेश आहे.

सरकारने १३७ कर्करोगविरोधी औषधांच्या ट्रेड मार्जिनवर नियंत्रण आणण्याचा निर्णय घेतला होता. त्यानंतर औषध कंपन्यांनी नव्या किमतींची माहिती दिली.

औषधांच्या किमती आणि पुरवठ्यावर प्रश्न

औषधांच्या किमती कमी झाल्यामुळे रुग्णांना दिलासा मिळण्याची अपेक्षा आहे. मात्र, किमती कमी करताना औषधांचा पुरवठा खंडित होणार नाही, याचीही काळजी घेणे आवश्यक आहे. विशेषतः पेटंट असलेल्या औषधांच्या किमती कायम असल्याने या निर्णयाच्या मर्यादांवर प्रश्न उपस्थित होत आहेत.

सर्वोच्च न्यायालयानेही व्यक्त केली होती चिंता Cancer Medicine Prices: 

कर्करोगाच्या औषधांच्या किमतींमधील मोठ्या तफावतीचा मुद्दा सर्वोच्च न्यायालयातही उपस्थित झाला होता. २९ सप्टेंबर रोजी झालेल्या सुनावणीदरम्यान, २,७०० रुपयांच्या औषधाची कमाल किरकोळ किंमत २७ हजार रुपये कशी, असा सवाल न्यायालयाने उपस्थित केला होता.

औषधांच्या किमतींमधील मोठी तफावत आणि रुग्णांवरील उपचारांचा वाढता आर्थिक भार याबाबत न्यायालयाने चिंता व्यक्त केली होती. त्यामुळे नव्या दरांमुळे रुग्णांना किती दिलासा मिळतो आणि औषधांचा पुरवठा सुरळीत राहतो का, याकडे लक्ष लागले आहे.