पिंपरी: मुख्यमंत्री फडणवीस यांचे आयुक्तांना आदेश पिंपरी-चिंचवड महापालिका प्रशासनाने चऱ्होली येथे प्रस्तावित केलेली नगररचना योजना (टीपी स्कीम) रद्द करण्याचे आदेश मुख्यमंत्री देवेंद्र फडणवीस यांनी महापालिका आयुक्त शेखर सिंह यांना बुधवारी (दि. १८) दिले. नागरिकांना विश्वासात घेतल्याशिवाय शहराचा सुनियोजित विकास करता येणार नाही. त्यामुळे नागरिकांनी संभ्रम करण्याची आवश्यकता नसल्याचे मुख्यमंत्र्यांनी यावेळी सांगितले.

पिंपरी-चिंचवड महापालिकेच्या वतीने शहरातील विविध विकासकामांचे भूमिपूजन आणि लोकार्पण करण्यात आले. यावेळी आयोजित कार्यक्रमात मुख्यमंत्री बोलत होते. यावेळी संत साहित्याचे गाढे अभ्यासक डॉ. सदानंद मोरे, खासदार श्रीरंग बारणे, आमदार महेश लांडगे, शंकर जगताप, विधान परिषदेच्या आमदार उमा खापरे, अमित गोरखे, आमदार श्रीकांत भारतीय, माजी आमदार अश्विनी जगताप, माजी महापौर नितीन काळजे, आयुक्त शेखर सिंह, पोलीस आयुक्त विनयकुमार चौबे, अतिरिक्त आयुक्त प्रदीप जांभळे-पाटील, विजयकुमार खोराटे, तृप्ती सांडभोर आदी उपस्थित होते.

महापालिका प्रशासनाने चऱ्होली येथे टीपी स्कीम प्रस्तावित केली होती. त्याला शेतकरी, भूमिपुत्र आणि स्थानिक नागरिकांनी विरोध केला. त्यानंतर प्रशासनाने ही योजना स्थगित करत असल्याचे जाहीर केले. मात्र, नागरिकांनी ती रद्द करण्याची मागणी लावून धरली होती. अखेर मुख्यमंत्री फडणवीस यांनी आयुक्तांना आदेश देत ही योजना रद्द करण्यास सांगितले.

यावेळी फडणवीस म्हणाले, ‘‘ पिंपरी चिंचवड महापालिकेच्या वतीने शहरामध्ये विविध विकासकामे करण्यात आली आहेत. तसेच शहराचा झपाट्याने विकास होत आहे. शहरातील पोलिस प्रशासन चांगले असून त्यांच्यासाठी मोठी इमारत शहरात उभी राहत आहे. शहरातील ज्येष्ठ नागरिकांसाठी तयार करण्यात आलेले ॲप ही एक चांगली संकल्पना आहे. ज्येष्ठ नागरिकांसाठी आधार होता आले पाहिजे. तसेच शहर वाढत असल्याने वाहतुकीची समस्या निर्माण झाली आहे. वाहतुकीचे नियमन करण्यासाठी एआयच्या धर्तीवर ॲप तयार करण्यात आले आहे. त्यामुळे शहरातील वाहतूक सुरळित होणार आहे.’’

या विकासकामांचे झाले उद्घाटन

वडमुखवाडी येथे उभारण्यात आलेल्या संत ज्ञानेश्वर महाराज आणि संत नामदेव महाराज भेटीचे समुहशिल्प, संतसृष्टी व संतपीठ येथील प्रेक्षागृह व कलादालनचे लोकार्पण करण्यात आले. याशिवाय संत मदर टेरेसा उड्डाणपूलावरून चिंचवड बाजूकडे उतरण्यास व चढण्यास बांधण्यात आलेला लूप, पवना नदीवर थेरगावमध्ये प्रसुनधाम शेजारी १८ मीटर डी.पी. रस्त्यावरील उभारण्यात आलेला थेरगाव-चिंचवड पूल, अमृत योजनेअंतर्गत उभारण्यात आलेला चिखली (१२ एमएलडी) व पिंपळे निलख (१५ एमएलडी) क्षमतेचा मैलाशुद्धीकरण प्रकल्प, पिंपळे सौदागर येथे गिर्यारोहणासाठी उभारण्यात आलेली क्लायबिंग वॉल, दिघी येथे आरक्षण क्र. २/१२२ येथील शाळा, चोविसावाडी येथील अग्निशमन केंद्र, भोसरी येथील प्रभाग क्र. ७ मधील प्राथमिक शाळा आदी प्रकल्पांचे लोकार्पण करण्यात आले.