Deepanshu Shokeen : दिल्ली विद्यापीठाच्या विद्यार्थी निवडणुकीत अखिल भारतीय विद्यार्थी परिषद अर्थात ABVP ने दमदार कामगिरी करत तीन जागांवर विजय मिळवला. काँग्रेसप्रणित NSUI ला मात्र एकाही जागेवर विजय मिळवता आला नाही. या निवडणुकीत सर्वाधिक चर्चा झाली ती उपाध्यक्षपदावर विजयी झालेल्या अपक्ष उमेदवार दीपांशू शौकीन यांची.

अवघ्या २१ वर्षांच्या दीपांशू शौकीन यांनी अपक्ष म्हणून निवडणूक लढवत प्रतिस्पर्ध्यांना आव्हान दिले आणि उपाध्यक्षपदावर विजय मिळवला. विशेष म्हणजे, ते NSUI शी संबंधित होते आणि याच संघटनेकडून निवडणूक लढवण्याची त्यांची तयारी होती. मात्र, ऐनवेळी त्यांचे तिकीट कापण्यात आले. त्यानंतर त्यांनी अपक्ष उमेदवारी दाखल करत निवडणुकीच्या मैदानात उतरण्याचा निर्णय घेतला.

अनवाणी पायांनी केला प्रचार

दीपांशू शौकीन यांच्या प्रचाराची पद्धतही या निवडणुकीत चर्चेचा विषय ठरली. त्यांनी संपूर्ण कॅम्पसमध्ये अनवाणी पायांनी फिरत प्रचार केला. निकालाच्या दिवशी मतमोजणी केंद्राजवळही ते अनवाणीच दिसले. त्यांच्या या प्रचारशैलीची विद्यार्थ्यांमध्ये विशेष चर्चा झाली.

कोण आहेत दीपांशू शौकीन?

दीपांशू शौकीन हे दिल्लीतील पीरागढी परिसरातील रहिवासी आहेत. त्यांची कौटुंबिक पार्श्वभूमी सर्वसामान्य असून त्यांचे वडील बस कंडक्टर, तर आई अंगणवाडी सेविका आहे. त्यांनी भगतसिंग कॉलेजमधून राज्यशास्त्र विषयात पदवी घेतली असून सध्या ते बुद्धिस्ट स्टडीजचे विद्यार्थी आहेत.

कुटुंबीयांची इच्छा होती की दीपांशूंनी UPSC परीक्षेची तयारी करावी. मात्र, त्यांनी विद्यार्थी राजकारणात सक्रिय होण्याचा निर्णय घेतला आणि दिल्ली विद्यापीठाच्या निवडणुकीत अपक्ष म्हणून नशीब आजमावले.

विजयानंतर दीपांशू काय म्हणाले?

विजयानंतर माध्यमांशी संवाद साधताना दीपांशू शौकीन यांनी विद्यार्थ्यांनी दाखवलेल्या विश्वासाबद्दल समाधान व्यक्त केले. विद्यार्थ्यांनीच त्यांच्या प्रचाराची धुरा सांभाळत त्यांना पाठिंबा दिल्याचे त्यांनी सांगितले. विद्यार्थ्यांचा खरा प्रतिनिधी म्हणून काम करण्यासाठी आपण ही लढाई लढल्याचेही त्यांनी नमूद केले.

महिला सुरक्षा, कॅम्पस आणि हॉस्टेलचे प्रश्न ठरले महत्त्वाचे

या निवडणुकीच्या प्रचारात महिला सुरक्षा, कॅम्पस सुरक्षा आणि हॉस्टेलच्या सुविधांचा विस्तार हे मुद्दे प्रमुख ठरले. सत्य निकेतन परिसरातील इमारत दुर्घटनेनंतर विद्यार्थ्यांच्या सुरक्षा आणि निवासाच्या प्रश्नाला विशेष महत्त्व मिळाले होते. या पार्श्वभूमीवर विजयी उमेदवारांनी विद्यार्थ्यांच्या समस्या सोडवण्याचे आश्वासन दिले.

ABVP ला तीन जागा, NSUI चा खातेही उघडता आले नाही

दिल्ली विद्यापीठाच्या विद्यार्थी संघटनेच्या निवडणुकीत ABVP ने अध्यक्ष, सचिव आणि संयुक्त सचिव या तीन पदांवर विजय मिळवला. यश डबास अध्यक्षपदी, रिया छाबडी सचिवपदी, तर लक्षराज सिंह संयुक्त सचिवपदी विजयी झाले. उपाध्यक्षपद मात्र अपक्ष उमेदवार दीपांशू शौकीन यांनी पटकावले.

दीपांशू शौकीन यांना ३०,६१५ मते मिळाली. अध्यक्षपदाच्या निवडणुकीत ABVP चे यश डबास यांना २४,५७६ मते मिळाली. त्यांनी NSUI चे विजय शंकर मीना यांचा २,०५३ मतांनी पराभव केला.

Pune District : शिरूर तालुक्यात कायद्याचा धाकच उरला नाही