C. P. Radhakrishnan : राजकीय मतभेद बाजूला ठेवून राष्ट्रीय हित आणि जनकल्याणाला सर्वोच्च प्राधान्य देण्याची गरज उपराष्ट्रपती सी. पी. राधाकृष्णन (C. P. Radhakrishnan) यांनी गुरुवारी व्यक्त करताना केंद्र आणि राज्यांमधील सहकार्य अधिक मजबूत करण्यासाठी सल्लामसलत, समन्वय आणि सामायिक जबाबदारीची संस्कृती विकसित करण्याचे आवाहनही त्यांनी केले.

सहकारी संघराज्यवाद आणि कायदे सुधारणा :
राष्ट्रीय व राज्य दृष्टिकोन या विषयावरील राष्ट्रीय परिषदेत ते बोलत होते. विधि आयोगाने आयोजित केलेल्या या कार्यक्रमाला केंद्रीय कायदा मंत्री अर्जुन राम मेघवाल उपस्थित होते.

राज्यसभेचे अध्यक्षही असलेल्या राधाकृष्णन यांनी लोकशाही व्यवस्थेत राजकीय मतभेद स्वाभाविक असल्याचे नमूद केले. मात्र, हे मतभेद राष्ट्राच्या आणि जनतेच्या व्यापक हितासाठी केल्या जाणाऱ्या सामूहिक प्रयत्नांच्या आड येता कामा नयेत, असे त्यांनी स्पष्ट केले.

टीम इंडियाची भावना अधिक दृढ करण्यासाठी केंद्र आणि राज्यांनी परस्पर विश्वास, सल्लामसलत आणि समन्वयाच्या माध्यमातून काम करण्याची आवश्यकता असल्याचे त्यांनी सांगितले. सहकारी संघराज्यवाद ही केवळ प्रशासकीय व्यवस्था नसून सामायिक उद्दिष्टे साध्य करण्यासाठीची सामूहिक बांधिलकी असल्याचे त्यांच्या (C. P. Radhakrishnan) भाषणातून अधोरेखित झाले.

विविधतेतील एकता
भारत हा केवळ राज्यांचा भौगोलिक संघ नसून विविध भाषा, संस्कृती, परंपरा आणि आकांक्षा यांची घटनात्मक भागीदारी आहे, असे उपराष्ट्रपती म्हणाले. देशाची खरी ताकद विविधतेतील एकता असल्याचे सांगताना त्यांनी भाषिक आणि सांस्कृतिक वैविध्याचा उल्लेख केला. कायद्याचे राज्य आणि न्यायासाठीची सामायिक बांधिलकी देशाला समान घटनात्मक दृष्टिकोनाखाली एकत्र आणते, असेही त्यांनी (C. P. Radhakrishnan) नमूद केले.