Buldhana Lonar Road Accident : राज्यात रस्ते अपघातांच्या घटना थांबण्याचं नाव घेत नाहीत. कधी भरधाव वेग, कधी खराब रस्ते तर कधी वाहनचालकांची निष्काळजीपणा यामुळे असे अपघात घडत असल्याचं चित्र आहे. आज सकाळी नागपूरजवळ समृद्धी महामार्गावर झालेल्या अपघातानंतर आता बुलढाणा जिल्ह्यातील लोणारजवळ आणखी एक भीषण अपघात घडला असून, यात दोन महिलांचा जागीच मृत्यू झाला आहे. लोणार ते किनगाव जट्टू मार्गावर भरधाव कारने समोरून येणाऱ्या रिक्षाला जोरदार धडक दिली. धडकेचा जोर इतका प्रचंड होता की रिक्षाचा अक्षरशः चुराडा झाला. या अपघातात रिक्षामधील दोन मजूर महिलांचा घटनास्थळीच मृत्यू झाला, तर सात महिला गंभीर जखमी झाल्या आहेत. अपघातानंतर रिक्षातील काही महिला दूरवर फेकल्या गेल्याने अनेकांना गंभीर दुखापत झाली. जखमींपैकी तीन महिलांची प्रकृती चिंताजनक असल्याची माहिती असून, त्यांना तातडीने उपचारासाठी दाखल करण्यात आले आहे. घटनेची माहिती मिळताच स्थानिक नागरिकांनी तत्काळ घटनास्थळी धाव घेत मदतकार्य सुरू केलं. त्यानंतर पोलिसांना पाचारण करण्यात आलं. जखमी महिलांवर लोणार आणि मेहकर येथील शासकीय रुग्णालयात उपचार सुरू आहेत. अपघाताची माहिती मिळताच जखमींच्या नातेवाईकांनीही रुग्णालयात धाव घेतली. दरम्यान, या अपघाताचा पुढील तपास पोलिसांकडून सुरू असून, कारचालकाची चौकशी केली जात आहे.