Union Budget : केंद्र सरकारने आर्थिक वर्ष 2027-28च्या अर्थसंकल्पाची तयारी सुरू केली आहे. केंद्रीय अर्थ मंत्रालयाकडून 12 ऑक्टोबरपासून विविध मंत्रालये आणि विभागांसोबत प्री-बजेट बैठका घेतल्या जाणार आहेत. सुमारे महिनाभर चालणाऱ्या या बैठका 13 नोव्हेंबरला पूर्ण होतील. या बैठकीत मंत्रालयांचा सध्याचा खर्च, सुधारित अंदाज आणि पुढील आर्थिक वर्षासाठी आवश्यक निधी यावर चर्चा होणार आहे.

अर्थ मंत्रालयाच्या अर्थसंकल्प विभागाने 23 सप्टेंबर रोजी सर्व मंत्रालये आणि विभागांना बैठकीचे वेळापत्रक पाठवले आहे. या बैठकांचे अध्यक्षस्थान व्यय सचिव भूषवणार आहेत. आर्थिक वर्ष 2026-27 मधील सुधारित खर्चाचा अंदाज आणि 2027-28साठी आवश्यक निधी यांचा आढावा घेतला जाईल.

सर्व मंत्रालयांना खर्च, उत्पन्न आणि पुढील वर्षातील आर्थिक गरजांची माहिती 6 ऑक्टोबरपर्यंत सादर करण्यास सांगण्यात आले आहे. या माहितीच्या आधारे पुढील वर्षासाठी सुरुवातीचा निधी निश्चित करण्याची प्रक्रिया होईल.

दरम्यान, 2027-28चा केंद्रीय अर्थसंकल्प 1 फेब्रुवारी 2027 रोजी सादर होण्याची शक्यता आहे. जागतिक आर्थिक परिस्थिती, पश्चिम आशियातील तणाव, कच्च्या तेलाच्या किमती आणि आर्थिक वाढ यांचा बजेटवर परिणाम होऊ शकतो. रोजगारनिर्मिती, देशांतर्गत मागणी आणि आर्थिक सुधारणा यांवरही सरकारचे लक्ष राहण्याची शक्यता आहे. विकासासाठी खर्च वाढवताना राजकोषीय स्थिती सांभाळण्याचे आव्हान सरकारसमोर असेल.