BRICS Summit:  BRICS देशांमधील व्यापार अधिक सोपा करण्यासाठी स्थानिक चलनांमध्ये व्यवहार वाढवण्याचे आवाहन केंद्रीय वाणिज्य व उद्योगमंत्री पीयूष गोयल यांनी केले. तसेच, सदस्य देशांच्या डिजिटल पेमेंट प्रणाली एकमेकांशी जोडण्याची गरज त्यांनी व्यक्त केली. यामुळे आंतरराष्ट्रीय व्यापारातील डॉलरवरील अवलंबित्व कमी करण्यास मदत होऊ शकते, असे ते म्हणाले.

BRICSमध्ये 11 प्रमुख उदयोन्मुख अर्थव्यवस्थांचा समावेश आहे. या देशांचे प्रतिनिधित्व जागतिक लोकसंख्येच्या सुमारे 49.5 टक्के, जागतिक अर्थव्यवस्थेच्या 40 टक्के आणि जागतिक व्यापाराच्या 26 टक्के आहे.

गोयल यांनी भारताच्या UPIचे उदाहरण देताना सांगितले की, UPIवर दरवर्षी 250 अब्जांहून अधिक व्यवहार होतात. तसेच, 11 देशांमध्ये UPIचा स्वीकार केला जात आहे. त्यामुळे BRICS देशांनी आपापल्या पेमेंट प्रणाली जोडण्याच्या दिशेने काम करावे, असे त्यांनी म्हटले.

BRICS देशांनी स्थानिक चलनांमध्ये व्यापार वाढवण्यासोबतच पुरवठा साखळी मजबूत करावी, असेही गोयल यांनी सांगितले. कच्चा माल, महत्त्वाची खनिजे आणि इतर वस्तूंसाठी बाजारपेठा खुल्या करण्याची गरज त्यांनी व्यक्त केली. व्यापारातील अनावश्यक नियम आणि गैर-शुल्क अडथळे कमी करण्याचे आवाहनही त्यांनी केले.

दरम्यान, रशियाचे आर्थिक विकासमंत्री मॅक्सिम रेशेतनिकोव्ह यांनीही स्थानिक चलनांतील व्यवहारावर भर दिला. तीन वर्षांपूर्वी रशियन निर्यातीतील डॉलर आणि युरोचा वाटा 85 टक्के होता. आता तो सुमारे 11 टक्क्यांवर आला असल्याचे त्यांनी सांगितले.

रशियाने BRICS ग्रेन एक्सचेंज स्थापन करण्याचा प्रस्तावही मांडला. तसेच, भारताचे वाणिज्य सचिव राजेश अग्रवाल यांनी जागतिक व्यापार वित्तपुरवठ्यातील सुमारे 2.5 लाख कोटी डॉलरच्या तुटीचा मुद्दा उपस्थित केला.