छत्रपती संभाजीनगर – ब्रॅंडेड दारुच्या नावाखाली बनावट दारु विक्रीचे प्रकार अनेकदा समोर आले आहे. दरम्यान असाच काही प्रकार जिल्ह्यात देखील समोर आला आहे. गोव्याची हलकी दारु महाराष्ट्रातील ब्रॅंडेड बाटलीत भरणाऱ्या टोळीतील मुख्य सूत्रधारासह दोघांना राज्य उत्पादन शुल्क विभागाने बेड्या ठोकल्यानंतर हा सर्व प्रकार समोर आला आहे.

ज्यात एक स्कोडा कारचा मालक आणि त्याच्या एका साथीदाराचा समावेश आहे. त्यांच्याकडून आणखी एक कार व मोबाईल, असा 11 लाख 10 हजारांचा मुद्देमाल जप्त करण्यात आला आहे. राज्य उत्पादन शुल्क विभागाच्या पथकाने 26 जून रोजी ही कारवाई केली आहे.

महादेव ऊर्फ देवा बाळासाहेब मुटकुळे (रा. मांडावा, ता. आष्टी, जि. बीड) आणि चंद्रकांत काशिनाथ गायकवाड, अशी अटकेतील आरोपींची नावे आहेत. तर राज्य उत्पादन शुल्क विभागाच्या अधिकाऱ्यांनी दिलेल्या माहितीनुसार, मुटकुळे हा मुख्य सूत्रधार असून गायकवाड हा स्कोडा कारचा मालक आहे.

दोन जण गोव्याची स्वस्त दारु महाराष्ट्रातील महागड्या ब्रॅंडच्या बाटलीत भरुन विदेशी मद्याची तस्करी करत असल्याची माहिती राज्य उत्पादन शुल्क विभागाच्या पथकाला मिळाली होती. मिळालेल्या माहितीनुसार, 17 जून रोजी पथकाने भेंडाळा फाटा शिवारात सापळा लावला होता. तेव्हा दादासाहेब पांडुरंग मुटकुळे (मूळ रा. मांडवा, ता. आष्टी, ह. मु. सिडको वाळूज महानगर-1) आणि दिनेश सखाराम धायडे (रा. घाणेगाव, ता. गंगापूर) या दोघांना ताब्यात घेण्यात आले. त्यांच्या ताब्यातून स्कोडा कार (एमएच 46, डब्ल्यू 9329) आणि बनावट इम्पेरिअल ब्ल्यू व्हिस्की 180 मिलिच्या बाटल्यांनी भरलेल्या 676 सीलबंद बाटल्या जप्त केल्या.