Divya Dutta Birthday: अभिनेत्री दिव्या दत्ता आज, २५ सप्टेंबरला आपला ४९वा वाढदिवस साजरा करत आहेत. लुधियानासारख्या छोट्या शहरातून आलेल्या दिव्या यांनी आपल्या अभिनयाच्या जोरावर हिंदीसोबतच पंजाबी आणि इतर भाषांमधील सिनेमातही वेगळी ओळख निर्माण केली. त्यांच्या फिल्मी प्रवासाला आता जवळपास तीन दशके झाली आहेत. मात्र, अभिनेत्री होण्याचा त्यांचा प्रवास अजिबात सोपा नव्हता.

दिव्या दत्ता यांचा जन्म २५ सप्टेंबर १९७७ रोजी पंजाबमधील लुधियाना येथे झाला. त्यांचे आई-वडील दोघेही डॉक्टर होते. घरात डॉक्टर होण्याचीच परंपरा असताना दिव्या यांना मात्र लहानपणापासूनच अभिनयाची आणि सिनेमाची आवड होती.

आत्यामुळे लागली सिनेमाची गोडी

लहानपणी दिव्या यांच्या बोलण्यात काही बदल झाले होते. त्यांचे आई-वडील सरकारी डॉक्टर असल्यामुळे घरी अनेक रुग्ण येत असत. त्यांच्याकडून दिव्या यांनी वेगवेगळ्या प्रकारची भाषा ऐकली आणि तीच भाषा त्या बोलू लागल्या. त्यामुळे वडिलांनी त्यांना दिल्लीतील आत्याकडे पाठवण्याचा निर्णय घेतला.

दिल्लीमध्ये दिव्या यांच्या तीन आत्या होत्या. त्यांनी जवळपास सात वर्षे दिव्या यांचा सांभाळ केला. यातील सर्वात छोट्या आत्यांना सिनेमे पाहण्याची खूप आवड होती. आत्यांसोबत सिनेमे पाहता पाहता दिव्या यांनाही अभिनयाची आणि अभिनेत्रींची आवड निर्माण झाली. कधी त्या नीतू कपूर यांच्यासारखी हेअरस्टाईल करून शाळेत जायच्या, तर कधी जीनत अमान किंवा हेमा मालिनी यांच्यासारखा लूक करायच्या. याच काळात त्यांच्या मनात अभिनेत्री होण्याचं स्वप्न रुजलं.

सातव्या वर्षी आयुष्य बदललं

दिव्या यांच्या आयुष्यात सातव्या वर्षी मोठा धक्का बसला. त्यांच्या वडिलांचं अचानक निधन झालं. त्यानंतर आईने दिव्या आणि त्यांच्या भावाची एकट्याने जबाबदारी घेतली. वडिलांच्या निधनानंतर दिव्या पुन्हा आईसोबत लुधियानाला आल्या. आईसोबत त्यांचं नातं खूप घट्ट होतं. आईला अभिनयाची आवड होती आणि त्या जुन्या अभिनेत्रींच्या अभिनयाची नक्कल करायच्या. दिव्या आईची नक्कल करताना अभिनयातील अनेक गोष्टी नकळत शिकल्या. पुढे ‘ट्रेन टू पाकिस्तान’सारख्या चित्रपटात काम करताना आईकडून शिकलेल्या या गोष्टी त्यांना उपयोगी पडल्या.

आईने दिली मुंबईला जाण्याची परवानगी

अभिनेत्री होण्याचं स्वप्न दिव्या यांनी आईसमोर मांडलं, तेव्हा अनेक नातेवाईकांनी विरोध केला. मात्र, त्यांच्या आईने मुलीची साथ सोडली नाही. दिव्या यांना फिल्मी मासिकं वाचण्याची आवड होती. एकदा ‘स्टारडस्ट’मध्ये आलेल्या टॅलेंट हंटची जाहिरात पाहून त्यांनी फॉर्म भरला. फॉर्म स्वीकारला गेल्यानंतर त्यांनी आईला सांगितलं की, आपल्याला अभिनेत्री व्हायचं आहे आणि मुंबईला जायचं आहे. कुटुंबातील अनेक जण या निर्णयाच्या विरोधात होते. पण आईने दिव्याच्या स्वप्नासाठी ठामपणे उभं राहत त्यांना मुंबईला जाण्याची परवानगी दिली.

मुंबईत आल्यानंतर दिव्या यांना अनेकदा नकाराचा सामना करावा लागला. मात्र, त्यांनी हार मानली नाही. १९९४ मध्ये ‘इश्क में जीना इश्क में मरना’ या चित्रपटातून त्यांच्या सिनेसृष्टीतील प्रवासाला सुरुवात झाली.

‘वीर-जारा’ने दिली नवी ओळख

दिव्या यांनी हिंदीसोबतच पंजाबी, तमिळ, तेलुगू, मल्याळम आणि इंग्रजी भाषांमधील चित्रपटांमध्येही काम केलं आहे. त्या डबिंग आर्टिस्टही राहिल्या आहेत. ‘कसूर’ या चित्रपटात त्यांनी लिसा रे यांच्यासाठी डबिंग केलं होतं.

‘वीर-जारा’मधील शब्बो या भूमिकेने त्यांना विशेष ओळख मिळाली. सुरुवातीला ही भूमिका करण्याची त्यांची इच्छा नव्हती. त्यांना शाहरुख खानची नायिका बनण्याचं स्वप्न होतं. मात्र, दिग्दर्शक आदित्य चोप्रा यांनी शब्बोची भूमिका करण्याचा सल्ला दिला. पुढे याच भूमिकेसाठी दिव्या यांचं मोठं कौतुक झालं. आज दिव्या दत्ता यांनी शंभरहून अधिक चित्रपटांमध्ये काम केलं आहे. ओटीटीवरही त्यांनी अनेक भूमिका साकारल्या आहेत.

लग्नाबाबत दिव्याचं स्पष्ट मत

दिव्या दत्ता आजही सिंगल आहेत. लग्न का केलं नाही, असं विचारलं असता त्या म्हणतात की, त्यांना योग्य जोडीदार मिळाला नाही. त्यांच्या मते, नातं असं असावं जे आपल्याला पुढे नेईल, आपल्या स्वप्नांना अडथळा आणणारं नसावं.

अभिनयाची आवड आणि स्वतःची ओळख जपताना दिव्या यांनी आपल्या आयुष्याचे निर्णय स्वतः घेतले. लहान शहरातून सुरू झालेला त्यांचा हा प्रवास आजही अनेकांसाठी प्रेरणादायी आहे.