OCI Cricketers Plea : भारतासाठी खेळायचे असेल तर विदेशी नागरिकत्व सोडा! ओसीआय खेळाडूंना मुंबई हायकोर्टाचा थेट इशारा
OCI Cricketers Plea : १२ ओसीआय कार्डधारक खेळाडूंना मुंबई उच्च न्यायालयाने स्पष्टपणे सांगितले आहे की, जर त्यांना भारतासाठी खेळण्याची तीव्र इच्छा असेल, तर त्यांनी भारतीय नागरिकत्व घ्यावे.
Bombay High Court Backs BCCI Rule on Indian Passport for OCI Cricketers : बीसीसीआयच्या देशांतर्गत स्पर्धांमध्ये खेळण्यासाठी भारतीय पासपोर्ट सक्तीचा करण्याच्या नियमाला आव्हान देणाऱ्या १२ ओसीआय म्हणजेच परदेशी नागरिकत्व असलेल्या युवा क्रिकेटपटूंना मुंबई उच्च न्यायालयाकडून मोठा झटका बसला आहे. भारतासाठी खेळण्याबाबत इतके उत्सुक असाल तर विदेशी नागरिकत्व सोडून भारतीय नागरिकत्वासाठी अर्ज करा, असा स्पष्ट पवित्रा न्यायालयाने घेतला आहे. मुख्य न्यायमूर्ती महेश चंद्र त्रिपाठी आणि न्यायमूर्ती अद्वैत सेठना यांच्या खंडपीठाने केविन कार्तिक नावाच्या खेळाडूच्या याचिकेवर सुनावणी करताना हा महत्त्वपूर्ण निर्णय दिला.
भारतात गुणवत्तेची कमतरता नाही; उच्च न्यायालयाचे परखड मत
याचिकाकर्त्यांच्या वकिलांनी असा दावा केला होता की, हे खेळाडू भारतातच राहून शिक्षण आणि क्रिकेटचा सराव करत आहेत; तसेच आयपीएल लिलावात जाण्यासाठी देशांतर्गत क्रिकेटचे आकडे लागतात, त्यामुळे त्यांना परवानगी मिळावी. त्यावर मुख्य न्यायमूर्ती त्रिपाठी यांनी रोखठोक उत्तर दिले की, भारतात युवा क्रिकेटपटूंची कमतरता नाही. अमेरिका, ब्रिटन किंवा जर्मनी स्वतःच्या नागरिकांना डावलून बाहेरील खेळाडूंना संधी देतात का, असा प्रश्न न्यायालयाने विचारला. दोन्ही देशांचे फायदे एकाच वेळी घेता येणार नाहीत, एकाची निवड करावीच लागेल, असे न्यायालयाने स्पष्ट केले.
क्रिकेट हा छंद बनवा, कमाईचे साधन नाही; बीसीसीआयचा युक्तिवाद
The Bombay High Court heard petitions by 12 OCI cricketers challenging the BCCI’s Indian passport rule for domestic tournaments.
The bench pointed to the abundance of cricketing talent in India and questioned why the petitioners could not seek Indian citizenship if they were keen to represent the country.
The case will be heard next on November 25.
Read more here: https://t.co/6Q4rhyMGkP
#BCCI #IndianCricket
— Sportstar (@sportstarweb) October 17, 2026
बीसीसीआयच्या वतीने ज्येष्ठ वकील डॉ. बीरेंद्र सराफ यांनी बाजू मांडताना सांगितले की, देशाच्या नागरिकत्व कायद्यानुसार ओसीआय कार्डधारक आंतरराष्ट्रीय पातळीवर भारताचे प्रतिनिधित्व करू शकत नाहीत. खेळाडूंना घडवण्यासाठी बोर्ड कोट्यवधी रुपये खर्च करते. त्यामुळे ओसीआय खेळाडू देशांतर्गत स्पर्धांना हक्क किंवा कमाईचे साधन मानू शकत नाहीत. ते खासगी अकादमी, शाळा आणि महाविद्यालयांच्या स्पर्धांमध्ये खेळू शकतात किंवा क्रिकेट छंद म्हणून जोपासू शकतात. त्यांनी भारतीय नागरिकत्व स्वीकारल्यास बीसीसीआय त्यांचे स्वागतच करेल, असे सराफ यांनी स्पष्ट केले.
२५ नोव्हेंबर रोजी पुढील सुनावणी; केंद्राला माहिती देण्याचे निर्देश
खेळाडूंच्या वकिलांनी आंतरराष्ट्रीय नियमांचा दाखला देत लहान मुलांवर नागरिकत्व बदलण्याची सक्ती करता येत नाही असा युक्तिवाद केला. त्यावर न्यायालयाने स्पष्ट केले की कोणावरही जबरदस्ती केली जात नसून भारतासाठी खेळायचे असल्यास हा केवळ एक पर्याय आहे. न्यायालयाने या प्रकरणाची पुढील सुनावणी २५ नोव्हेंबर रोजी निश्चित केली आहे. सोबतच ज्या ओसीआय खेळाडूंनी भारतीय नागरिकत्वासाठी अर्ज केले आहेत, त्यांची संपूर्ण माहिती सादर करण्याचे निर्देश बीसीसीआय आणि केंद्र सरकारला दिले आहेत.
