Kiara advani : ‘KGF’मधील रॉकी भाईच्या भूमिकेतून जगभरात जबरदस्त लोकप्रियता मिळवलेला यश आता ‘टॉक्सिक : अ फेरी टेल फॉर ग्रोन-अप्स’मधून प्रेक्षकांच्या भेटीला येण्यासाठी सज्ज झाला आहे. या बहुप्रतिक्षित चित्रपटाचा ट्रेलर ८ ऑगस्ट रोजी बेंगळुरूमध्ये दिमाखदार कार्यक्रमात लाँच करण्यात आला.

यशसोबत कियारा अडवाणी, नयनतारा, तारा सुतारिया, हुमा कुरेशी, रुक्मिणी वसंत यांच्यासह चित्रपटातील कलाकार या कार्यक्रमाला उपस्थित होते. मात्र, ट्रेलरपेक्षा सर्वाधिक चर्चा रंगली ती कियाराच्या भूमिकेची.

‘टॉक्सिक’मधील कियाराचा लूक, तिची व्यक्तिरेखा आणि यशसोबतचे काही इंटिमेट सीन्स याआधीच सोशल मीडियावर चर्चेचा विषय ठरले होते. काही प्रेक्षकांनी या दृश्यांवरून कियाराला मोठ्या प्रमाणात ट्रोलही केलं.

त्यामुळे ट्रेलर लाँचच्या वेळी कियारा या टीकेवर काय बोलणार, याकडे सर्वांचं लक्ष लागलं होतं. अखेर कियाराने आपल्या भूमिकेबद्दल अशी प्रतिक्रिया दिली की, तिच्या या विधानाचीच सोशल मीडियावर जोरदार चर्चा सुरू झाली आहे.

यश आणि गीतू यांनी मला नादिया बनण्यासाठी मॅनिफेस्ट केलं!

ट्रेलर लाँचदरम्यान कियाराने तिच्या ‘नादिया’ या व्यक्तिरेखेबद्दल मनमोकळेपणाने भाष्य केलं. ती म्हणाली की, दिग्दर्शिका गीतू मोहनदास आणि यश यांनी तिला या भूमिकेसाठी सुरुवातीपासूनच योग्य मानलं होतं.

“मी खरंच असं मानते की गीतू आणि यश यांनी मला या चित्रपटात नादिया बनण्यासाठी मॅनिफेस्ट केलं आहे. एक अभिनेत्री म्हणून मी इतकं निडर पाऊल उचलण्यासाठी तयार असल्याची भावना माझ्या मनात येण्याआधीच त्यांनी मला त्या भूमिकेत पाहिलं आणि माझ्यावर विश्वास ठेवला,” असं कियाराने सांगितलं.

कियाराच्या मते, ‘नादिया’ ही व्यक्तिरेखा तिच्यासाठी केवळ आणखी एक फिल्मी भूमिका नाही, तर अभिनेत्री म्हणून स्वतःला वेगळ्या पद्धतीने सादर करण्याची संधी आहे. कियाराने या भूमिकेला आपल्या करिअरमधील ‘मैलाचा दगड’ असल्याचं म्हटलं आहे. तिच्या मते, ‘टॉक्सिक’नंतर तिच्या अभिनयाकडे पाहण्याचा दृष्टिकोनही बदलू शकतो.

इंटिमेट सीन्सवरून ट्रोलिंग; कियाराचं उत्तर चर्चेत….

चित्रपटाच्या प्रमोशनदरम्यान यश आणि कियाराच्या काही बोल्ड आणि इंटिमेट दृश्यांवर सोशल मीडियावर जोरदार प्रतिक्रिया उमटल्या होत्या. विशेषतः गाणे, टीझर आणि प्रमोशनल फुटेजमधील काही दृश्यांवरून कियाराला ट्रोल करण्यात आलं.

मात्र, या टीकेचा आपल्या भूमिकेवर परिणाम झाल्याचं कियाराने दाखवून दिलं नाही. उलट, तिने नादिया या व्यक्तिरेखेबद्दल बोलताना ही भूमिका शब्दांत समजावून सांगणं कठीण असल्याचं म्हटलं.

“मी नादिया या भूमिकेचं वर्णन एका शब्दात करू शकत नाही. त्यासाठी तुम्हाला तो अनुभव घ्यावा लागेल. यश आणि गीतू या दोघांनी मला अक्षरशः बिघडवलं आहे. चित्रपट पाहिल्यानंतर प्रेक्षकांनाही ही गोष्ट समजेल,” असं कियाराने सांगितलं.

यशही कियाराच्या समर्थनार्थ मैदानात

कियाराच्या इंटिमेट सीन्सवरून झालेल्या ट्रोलिंगच्या पार्श्वभूमीवर यशनेही ट्रेलर लाँचच्या कार्यक्रमात तिच्या समर्थनार्थ भूमिका घेतल्याचं वृत्त आहे. त्यामुळे ‘टॉक्सिक’च्या प्रमोशनमध्ये यश-कियारा यांच्या ऑनस्क्रीन केमिस्ट्रीसोबतच त्यांच्या ऑफस्क्रीन विधानांचीही चर्चा रंगली आहे.

दिग्दर्शिका गीतू मोहनदास यांच्या दिग्दर्शनाखाली तयार झालेल्या या चित्रपटात यशसोबत कियारा अडवाणी, नयनतारा, हुमा कुरेशी, तारा सुतारिया आणि रुक्मिणी वसंत महत्त्वाच्या भूमिकांमध्ये आहेत.