Kriti Sanon: बॉलिवूड अभिनेत्री कृति सेनन  (Kriti Sanon )  हिने तिच्या वैयक्तिक आयुष्याशी संबंधित एक महत्त्वाचा खुलासा करत सर्वांचे लक्ष वेधून घेतले आहे. एका पॉडकास्टमध्ये बोलताना कृतीने काही वर्षांपूर्वी तिने एग फ्रीझिंग (Egg Freezing) केल्याचे सांगितले. हा निर्णय तिने तिच्या राष्ट्रीय पुरस्कार विजेत्या मिमी या चित्रपटाच्या तयारीदरम्यान घेतल्याचेही तिने स्पष्ट केले.

करिश्मा मेहता यांच्या पॉडकास्टमध्ये कृतिने या निर्णयामागील कारण सविस्तर सांगितले. ती म्हणाली की, ‘मिमी’ या चित्रपटासाठी तिला भूमिकेच्या गरजेनुसार वजन वाढवावे लागणार होते. त्याच काळात एग फ्रीझिंग करण्याची योग्य वेळ असल्याचे तिला वाटले. कारण या प्रक्रियेदरम्यान हार्मोनल इंजेक्शन्स घ्यावी लागतात आणि त्यामुळे काही काळ शरीरात सूज येणे किंवा वजन वाढल्यासारखे वाटू शकते. त्यामुळे चित्रपटासाठी वजन वाढवण्याचा काळ आणि एग फ्रीझिंगची प्रक्रिया एकाच वेळी पूर्ण करण्याचा निर्णय तिने घेतला. ( Kriti Sanon)

कृतिने सांगितले की, काही वर्षांपूर्वी एका व्यक्तीने तिला सल्ला दिला होता की, जर संधी असेल तर एग फ्रीझिंग हा स्वतःला दिलेला सर्वात मोठा आणि महत्त्वाचा भेटवस्तूसारखा निर्णय ठरू शकतो. ही गोष्ट तिच्या मनात कायम राहिली होती. त्यामुळे योग्य वेळ मिळताच तिने हा निर्णय घेतला.   (Kriti Sanon)

 

 

एग फ्रीझिंग ही अशी वैद्यकीय प्रक्रिया आहे, ज्यामध्ये महिलेची अंडी (Eggs) भविष्यातील गर्भधारणेचा पर्याय उपलब्ध राहावा म्हणून सुरक्षितरीत्या गोठवून ठेवली जातात. करिअर, वैयक्तिक आयुष्य किंवा इतर कारणांमुळे काही महिला मातृत्व पुढे ढकलण्याचा निर्णय घेतात. अशा वेळी ही प्रक्रिया भविष्यासाठी एक पर्याय ठरू शकते. मात्र, हा निर्णय प्रत्येक व्यक्तीच्या आरोग्य, वय आणि वैयक्तिक परिस्थितीनुसार डॉक्टरांच्या सल्ल्यानेच घेतला पाहिजे. (  Kriti Sanon)

कृतिने या प्रक्रियेबद्दल बोलताना सांगितले की, हार्मोनल इंजेक्शन्समुळे शरीरात काही तात्पुरते बदल जाणवू शकतात. त्यामुळे तिने चित्रपटासाठी वजन वाढवण्याच्या काळातच ही प्रक्रिया पूर्ण केली. तिच्या मते, त्यामुळे वेगळ्या काळात पुन्हा शरीरात होणारे बदल स्वीकारण्याची गरज भासली नाही.

कृतिचा विश्वास आहे की, ज्या महिलांकडे हा पर्याय उपलब्ध आहे आणि ज्यांना भविष्यात मातृत्वाचा विचार करायचा आहे, त्यांच्यासाठी एग फ्रीझिंग हा एक विचारपूर्वक घेतलेला निर्णय ठरू शकतो. मात्र, हा निर्णय पूर्णपणे वैयक्तिक असून प्रत्येक महिलेने स्वतःच्या गरजा, आरोग्य आणि तज्ज्ञांच्या सल्ल्यानुसारच तो घ्यावा.

कृतिच्या या स्पष्ट आणि प्रामाणिक वक्तव्याचे अनेकांनी कौतुक केले आहे. महिलांच्या प्रजनन आरोग्याबाबत उघडपणे बोलण्याची गरज असल्याचे मत अनेकांनी व्यक्त केले आहे. सेलिब्रिटी अशा विषयांवर मोकळेपणाने बोलत असल्याने समाजात जागरूकता वाढण्यास मदत होत असल्याचेही मानले जाते.

दरम्यान, मिमी चित्रपटातील उत्कृष्ट अभिनयासाठी कृति सेननला राष्ट्रीय पुरस्कार मिळाला होता. आता तिच्या या वैयक्तिक निर्णयामुळे ती पुन्हा एकदा चर्चेत आली आहे.