Actor Imran Khan – एसआयआर मुद्द्यावरून झालेल्या आंदोलनात सहभागी झाल्याबद्दल मुंबई उच्च न्यायालयाने सोमवारी अभिनेता इम्रान खानला कडक शब्दांत फटकारले. न्यायालयाने स्पष्ट केले की, आंदोलनाचा मूलभूत अधिकार केवळ भारतीय नागरिकांनाच प्राप्त आहे. यानंतर इम्रान खानने बिनशर्त माफी मागितली.

मुख्य न्यायमूर्ती महेश चंद्र त्रिपाठी आणि न्यायमूर्ती अद्वैत सेठना यांच्या खंडपीठाने म्हटले की, भारताची उदारता इतकी मोठी आहे की, अमेरिकेचा नागरिक असूनही आणि ओव्हरसीज सिटिझन ऑफ इंडिया कार्डधारक असूनही, त्याला थेट देशाबाहेर काढण्याऐवजी, आधी देश सोडून जाण्याबाबत नोटीस बजावण्यात आली आहे.

खानचे वकील व्यंकटेश धोंड यांनी त्वरित एक हमीपत्र सादर केले की, अभिनेता भविष्यात कोणत्याही आंदोलनात सहभागी होणार नाही. तसेच, त्यांनी खानच्या वतीने बिनशर्त माफीही मागितली. खंडपीठाने आता या प्रकरणाची पुढील सुनावणी ७ डिसेंबर रोजी निश्चित केली आहे.

इम्रान खानने फॉरेनर्स रिजनल रजिस्ट्रेशन ऑफिसद्वारे बजावलेल्या नोटीसच्या विरोधात याचिका दाखल केली होती. गेल्या महिन्यात मुंबईत मुख्य निवडणूक आयुक्त ज्ञानेश कुमार यांच्या विरोधात झालेल्या आंदोलनात सहभागी झाल्यामुळे, त्याला २८ ऑक्टोबरपर्यंत देश सोडून जाण्यास सांगणारी नोटीस बजावण्यात आली होती. उच्च न्यायालयाने आपली आधीची नोटीसवरील अंतरिम स्थगिती कायम ठेवली.

मी नोकरीचा शोधतोय

न्यायालयाने इम्रान खान यांना खडेबोल सुनावले. तुम्ही नेमके तिथे का गेला होतात, भारताचे नागरिक आणि ओसीआय कार्ड यांचे हक्क वेगळे आहेत, असे म्हणत उच्च न्यायालयाकडून विचारणा करण्यात आली. एसआयआरप्रकरणी आंदोलन होते, तुमचा त्याच्याशी काही संबंध असूच शकत नाही. तुम्ही नोकरीचा शोध घेत असल्याचे म्हटले आहे.

तुम्हाला नोकरी मिळाली का, असा सवाल देखील उच्च न्यायालयने विचारला. त्यावर, सध्या आमच्याकडे पिक्चर नाही, माझे बालपण इथे गेले आहे, अशी माहिती इम्रान खानच्या वकिलांनी न्यायायलयाला दिली. यापुढे अशा आंदोलनात ना सहभागी होणार, ना कोणाला जायला प्रवृत्त करणार असे लिहून द्यावं लागेल. तसेच तुम्हाला बिनर्शत माफी मागावी लागेल, असेही न्यायालयाने स्पष्ट केले.