World EV Day 2026 : भारतात पेट्रोल, डिझेल आणि सीएनजीच्या दरांमध्ये सातत्याने वाढ होत असल्याने वाहनचालकांच्या खिशाला मोठी झळ बसत आहे. वाढत्या इंधनखर्चामुळे सर्वसामान्य ग्राहकांचा कल आता पर्यायी इंधनावर चालणाऱ्या वाहनांकडे वाढताना दिसत आहे. यामध्ये इलेक्ट्रिक वाहनांना विशेष पसंती मिळत आहे.

आज, ९ सप्टेंबर रोजी जागतिक ईव्ही दिन २०२६च्या निमित्ताने १० लाख रुपयांपेक्षा कमी बजेटमध्ये उपलब्ध असलेल्या इलेक्ट्रिक कार कोणत्या आहेत, हे जाणून घेऊयात. याचदरम्यान भारतीय बाजारपेठेत Blinq RYDE या नव्या इलेक्ट्रिक कारचीही एन्ट्री झाली आहे. अत्याधुनिक फीचर्स आणि परवडणारी किंमत यामुळे ही कार ग्राहकांचे लक्ष वेधून घेण्याची शक्यता आहे.

दरम्यान, FADAने नुकत्याच प्रसिद्ध केलेल्या अहवालानुसार, गेल्या महिन्यात इलेक्ट्रिक वाहनांच्या विक्रीत लक्षणीय वाढ नोंदवण्यात आली आहे. त्यामुळे भारतीय वाहन बाजारात ईव्हीचा वाढता प्रभाव स्पष्ट होत आहे.

टाटा टियागो ईव्ही

१० लाख रुपयांपेक्षा कमी बजेटमध्ये टाटा टियागो ईव्ही हा ग्राहकांसाठी एक चांगला पर्याय ठरू शकतो. या कारची एक्स-शोरूम किंमत ६.९९ लाख रुपयांपासून सुरू होते. व्हेरिएंटनुसार ही कार एका चार्जमध्ये सुमारे २२६ ते २८५ किलोमीटरपर्यंतची रेंज देते. या कारच्या टॉप व्हेरिएंटची किंमत १०.०९ लाख रुपये (एक्स-शोरूम) आहे.

एमजी कॉमेट ईव्ही

इलेक्ट्रिक कारच्या बाजारात एमजी कॉमेट ईव्हीनेही आपली वेगळी ओळख निर्माण केली आहे. या कारची एक्स-शोरूम किंमत ७.८० लाख रुपयांपासून सुरू होते. कंपनीच्या माहितीनुसार, ही कार एका चार्जमध्ये २३० किलोमीटरपर्यंतचे अंतर कापू शकते. टॉप व्हेरिएंटची किंमत १०.०७ लाख रुपये (एक्स-शोरूम) आहे.

टाटा पंच ईव्ही

इलेक्ट्रिक एसयूव्हीचा पर्याय शोधणाऱ्या ग्राहकांसाठी टाटा पंच ईव्ही आकर्षक ठरू शकते. या कारची एक्स-शोरूम किंमत ९.७९ लाख रुपयांपासून सुरू होते. व्हेरिएंटनुसार ही कार एका चार्जमध्ये २७५ ते ३५० किलोमीटरपर्यंतची रेंज देते. टॉप व्हेरिएंटची किंमत १२.९९ लाख रुपये (एक्स-शोरूम) आहे. या कारला ग्राहकांकडून चांगला प्रतिसाद मिळत असल्याचे विक्रीच्या आकडेवारीवरून दिसून येते.

सिट्रोएन eC3X

सिट्रोएन eC3X हीदेखील भारतीय इलेक्ट्रिक कार बाजारातील एक महत्त्वाची कार आहे. या कारची एक्स-शोरूम किंमत ११.९९ लाख रुपयांपासून सुरू होते. कंपनीच्या दाव्यानुसार, एका चार्जमध्ये ही कार ३३० किलोमीटरपर्यंतची रेंज देते. मात्र, १० लाख रुपयांच्या बजेटपेक्षा तिची सुरुवातीची किंमत अधिक आहे.

Blinq RYDE ची बाजारात एन्ट्री

दरम्यान, भारतीय बाजारपेठेत Blinq RYDE या नव्या इलेक्ट्रिक कारची एन्ट्री झाली आहे. या कारची एक्स-शोरूम किंमत सुमारे ४.५० लाख रुपयांपासून सुरू होते आणि ५ लाख रुपयांपर्यंत जाते. त्यामुळे कमी बजेटमध्ये इलेक्ट्रिक वाहन घेऊ इच्छिणाऱ्या ग्राहकांसाठी हा पर्याय महत्त्वाचा ठरू शकतो. कंपनीने Blinq RYDE दोन प्रमुख व्हेरिएंटमध्ये सादर केली आहे. RYDE Familyआणि RYDE Fleets कौटुंबिक वापरासोबतच कमर्शियल फ्लीट ऑपरेटर्सना लक्षात घेऊन या कारची निर्मिती करण्यात आली आहे.

Blinq RYDEमध्ये कॉम्पॅक्ट आणि ऊर्जा-कार्यक्षम इलेक्ट्रिक मोटर देण्यात आली आहे. रेंजच्या बाबतीत कंपनीच्या माहितीनुसार, ही कार एकदा पूर्ण चार्ज केल्यानंतर २५० किलोमीटरपर्यंतचे अंतर कापू शकते. परवडणारी किंमत, इलेक्ट्रिक पॉवरट्रेन आणि विविध फीचर्समुळे Blinq RYDEकडे बजेट ईव्ही सेगमेंटमधील संभाव्य पर्याय म्हणून पाहिले जात आहे.

Student of the Year 3 : ‘स्टुडंट ऑफ द इयर 3′ चित्रपटाऐवजी आता वेबसीरिज बनणार; ‘या’ अभिनेत्रीची होणार एन्ट्री?