BJYM 2026: भाजपने युवा मोर्चाची राष्ट्रीय कार्यकारणीची यादी जाहीर केली आहे. भाजपाचे राष्ट्रीय अध्यक्ष नितीन नबीन यांच्या ‘स्पेशल ३४’टीममध्ये देशभरातील तरुण चेहऱ्यांचा समावेश आहे. या राष्ट्रीय कार्यकारणीमध्ये महाराष्ट्रातील ३ नेत्यांवर मोठी जबाबदारी सोपवण्यात आली आहे.

मुंबई महापालिकेच्या नगरसेविका सायली कुलकर्णी यांची भाजपा युवा मोर्चाच्या राष्ट्रीय मंत्रीपदी नियुक्ती करण्यात आली. तर सांगलीतील वीरेंद्र पृथ्वीराज पाटील आणि मुंबईतील गुरदित सिंह वोहरा यांचा राष्ट्रीय कार्यकारिणी सदस्यांमध्ये समावेश करण्यात आला आहे. भाजप युवा मोर्चाचे अध्यक्ष आणि वडोदराचे खासदार हेमांग जोशी यांनी पक्षाच्या युवा मोर्चाची राष्ट्रीय कार्यकारणीच्या नवनियुक्त पदाधिकाऱ्यांच्या नावांची घोषणा केली.

भाजपा युवा मोर्चाच्या नव्या राष्ट्रीय टीममध्ये विविध राज्यांतील युवा नेत्यांना संघटनात्मक जबाबदाऱ्या देण्यात आल्या आहेत. राष्ट्रीय उपाध्यक्ष, राष्ट्रीय सरचिटणीस, राष्ट्रीय सचिव तसेच माध्यम आणि सोशल मीडिया विभागांसाठीही नियुक्त्या करण्यात आल्या आहेत.

उत्तर प्रदेशचे सर्वाधिक पाच सदस्य

राष्ट्रीय कार्यकारिणीच्या ३४ सदस्यांपैकी उत्तर प्रदेशचे सर्वाधिक पाच सदस्य आहेत. बिहार, गुजरात, केरळ, मध्य प्रदेश, महाराष्ट्र आणि राजस्थान यांचे प्रत्येकी दोन सदस्य आहेत. याव्यतिरिक्त दिल्ली, छत्तीसगड, पंजाब, जम्मू आणि काश्मीर, लडाख, त्रिपुरा आणि पश्चिम बंगाल यांसह इतर राज्ये आणि केंद्रशासित प्रदेशांमधून १७ सदस्य निवडले गेले आहेत.

राष्ट्रीय उपाध्यक्ष म्हणून नियुक्त करण्यात आलेल्या सात नेत्यांमध्ये जम्मू-काश्मीरचे आमदार शगुन परिहार आणि बंगालचे आमदार सौमेन कर्फा यांचा समावेश आहे. इतर नेत्यांमध्ये उत्तर प्रदेशचे निखिल मणी तिवारी, नागालँडचे अरविंद दमानी, तेलंगणाचे मलोथ कोमाली नाईक, बिहारचे राजेंद्र सिंह आणि छत्तीसगडचे भूपेंद्र नाग यांचा समावेश आहे. भाजपने बिहारच्या आमदार आणि प्रसिद्ध लोकगायिका मैथिली ठाकूर यांची युवा मोर्चाच्या राष्ट्रीय कार्यकारिणीवर सदस्य म्हणून नियुक्ती केली.

राष्ट्रीय कार्यकारिणी सदस्यांचे काम  –

• भारतीय जनता युवा मोर्चाच्या राष्ट्रीय कार्यकारिणीचे सदस्य पक्षाची धोरणे तरुणांपर्यंत पोहोचवतात.
• संघटना मजबूत करण्यास मदत करतात.
• केंद्र सरकारच्या योजनांचा प्रचार केला जातो.
• विविध मोहिमा व आंदोलने प्रभावीपणे राबविण्यात महत्त्वाची भूमिका बजावतात.
• देशभरात युवा मोर्चाचे जाळे मजबूत करणे
• नवीन तरुणांना पक्षाशी जोडणे ही त्यांची महत्त्वाची जबाबदारी आहे.
• राज्य आणि जिल्हास्तरीय घटकांशी समन्वय साधून पक्षाच्या सूचनांची खालच्या स्तरावर अंमलबजावणी केली जाते.

हेही वाचा: 

BHAGWANT MANN: भगवंत मान यांना दिल्ली विमानतळावर 3 तास थांबवले ; 50 हजार रुपयांचा ठोठावला दंड