Aaditya Thackeray – शिवसेना (ठाकरे) नेते आदित्य ठाकरे  (Aaditya Thackeray) यांनी गुरुवारी सत्ताधारी भाजपवर मुंबईतील मोकळ्या जागा हडपण्याचा प्रयत्न करत असल्याचा आरोप केला. ते एका पत्रकार परिषदेत बोलत होते.

ठाकरे म्हणाले, बृहन्मुंबई महानगरपालिका आणि महाराष्ट्र गृहनिर्माण व क्षेत्र विकास प्राधिकरण (म्हाडा) यांच्या मालकीचे तीन सार्वजनिक भूखंड भाजपच्या एका आमदाराशी संबंधित असलेल्या विलेपार्ले केळवणी मंडळाला देण्यात आले आहेत.

मुंबईतील मोकळ्या जागा हडपणे हे भाजपचे धोरण आहे. सत्ताधारी पक्षाने शहराच्या मोकळ्या जागा बळकावण्याच्या केलेल्या प्रयत्नांविरोधात शिवसेना (ठाकरे) निषेध रॅली काढणार असल्याचेही ठाकरे यांनी सांगितले.  (Aaditya Thackeray)

एकूण १६ एकरचे हे तीन भूखंड सध्या जनतेच्या वापरासाठी उपलब्ध आहेत आणि स्थानिक रहिवाशांसाठी ते बाग, मनोरंजनाची ठिकाणे, क्रीडांगणे व पर्यावरणपूरक मालमत्ता म्हणून उपयुक्त ठरत आहेत.

 

वांद्रे येथील नेव्हिल डिसूझा फुटबॉल टर्फ हे भाजपच्या लाडक्या कंत्राटदाराला कन्व्हेन्शन सेंटर (संमेलन केंद्र) उभारण्यासाठी दिले जात आहे. या मैदानावर हजारो लोक खेळाचा सराव करतात.

मुंबईच्या मोकळ्या जागा बळकावून त्या भाजपच्या आमदाराला देण्याचे मुख्यमंत्र्यांचे धोरण असल्याचे दिसते. मुंबईची प्रतिष्ठित मैदाने असलेल्या आझाद मैदान, ओव्हल मैदान आणि शिवाजी पार्कवरही डोळा ठेवण्यास भाजप मागे-पुढे पाहणार नाही, असा दावा ठाकरे यांनी केला.