जेजुरी : भारतीय जनता युवा मोर्चा, पुणे ग्रामीणच्या वतीने जेजुरी येथे आयोजित करण्यात आलेल्या ‘युवा निर्धार मेळाव्याला हजारो तरुणांनी उत्स्फूर्त उपस्थिती लावत भाजप युवा मोर्चाचे जोरदार शक्तिप्रदर्शन केले. युवा प्रश्न, रोजगार, शिक्षण, कौशल्य विकास, शासकीय योजना आणि संघटनात्मक विस्तार या विविध विषयांवर यावेळी युवा कार्यकर्त्यांशी संवाद साधण्यात आला.

यावेळी बोलताना आमदार गोपीचंद पडळकर यांनी भाजपची संघटनात्मक विचारधारा आणि कार्यकर्त्यांच्या कर्तृत्वाला मिळणाऱ्या संधीवर भाष्य केले. “भारतीय जनता पार्टी ही घराणेशाहीवर नव्हे, तर कार्यकर्त्यांच्या कर्तृत्वावर विश्वास ठेवणारी संघटना आहे. सामान्य कुटुंबातील कार्यकर्त्याला पक्षातील सर्वोच्च जबाबदारीपासून देशाच्या नेतृत्वापर्यंत पोहोचण्याची संधी भाजपमध्ये मिळते,” असे त्यांनी सांगितले.

बिहारमधील सामान्य कार्यकर्ता पक्षाच्या राष्ट्रीय अध्यक्षपदापर्यंत पोहोचतो, तसेच पडळकरवाडीसारख्या छोट्या गावातील सामान्य कुटुंबातील तरुण विधिमंडळात पोहोचतो, ही कार्यकर्त्यांच्या कर्तृत्वाला संधी देणाऱ्या भाजपच्या विचाराची ताकद असल्याचे पडळकर यांनी नमूद केले.

२०१४ नंतर पंतप्रधान नरेंद्र मोदी यांच्या नेतृत्वाखाली देशात झालेल्या विकासकामांचा उल्लेख करताना विमानतळांची वाढ, वैद्यकीय शिक्षणाचा विस्तार तसेच सामान्य आणि बहुजन समाजातील तरुणांना शिक्षण, कौशल्य आणि विविध संधींच्या माध्यमातून पुढे जाण्यासाठी निर्माण झालेल्या संधींबाबतही त्यांनी युवा कार्यकर्त्यांशी संवाद साधला.

“युवा मोर्चाच्या कार्यकर्त्यांची जबाबदारी मोठी आहे. गावागाड्यातील, उपेक्षित आणि वंचित घटकांतील होतकरू तरुणांना सोबत घ्या, त्यांना संघटनेत व्यासपीठ द्या. शासनाच्या विविध योजनांचा अभ्यास करून त्याचा लाभ तळागाळातील नागरिकांपर्यंत पोहोचवण्यासाठी काम करा,” असे आवाहन पडळकर यांनी केले.

युवा मोर्चा पुणे ग्रामीणचे जिल्हाध्यक्ष वैभव सोलनकर यांनी यावेळी आमदार रोहित पवार यांच्यावर जोरदार टीका केली. “तरुणांच्या प्रश्नांना योग्य दिशा देण्याऐवजी तरुण पोरांची माथी भडकवण्याचे काम केले जात आहे. युवकांना भडकावण्यापेक्षा त्यांच्या हाताला रोजगार, शिक्षण आणि कौशल्याची ताकद देण्याची गरज आहे,” असा घणाघाती आरोप सोलनकर यांनी केला.

“युवक ही देशाची ताकद आहे. ही ताकद सकारात्मक विकासासाठी वापरली पाहिजे. प्रत्येक गावातील तरुणांशी संवाद साधून त्यांच्या अडचणी समजून घेणे आणि त्यांना शासनाच्या योजनांचा लाभ मिळवून देणे हे युवा मोर्चाचे प्रमुख कर्तव्य आहे,” असेही सोलनकर यांनी सांगितले.

भाजप पुणे ग्रामीणचे जिल्हाध्यक्ष शेखर वढणे यांनी भाजपच्या संघर्षातून उभ्या राहिलेल्या पक्षाच्या प्रवासाची माहिती देत कार्यकर्त्यांनी पक्षाची विचारधारा आणि संघटन तळागाळापर्यंत पोहोचवण्याचे आवाहन केले. संघटना मजबूत करण्यासाठी प्रत्येक कार्यकर्त्याने आपल्या गावात सक्रिय राहण्याची गरज असल्याचे त्यांनी सांगितले.

भाजप युवा मोर्चाचे प्रदेशाध्यक्ष कृष्णराज महाडीक यांनी तरुणांच्या रोजगाराच्या प्रश्नावर विशेष भर दिला. “तरुणांना रोजगाराच्या संधी मिळाव्यात, यासाठी शासनाच्या विविध योजना आणि उपक्रमांची माहिती युवकांपर्यंत पोहोचवली पाहिजे. केवळ योजना तयार होणे पुरेसे नाही, तर त्या योजनांचा लाभ शेवटच्या तरुणापर्यंत पोहोचवण्याची जबाबदारी कार्यकर्त्यांनी घेतली पाहिजे,” असा संदेश त्यांनी दिला.

युवाशक्तीच्या बळावर भाजप युवा मोर्चाचे संघटन अधिक मजबूत करण्यासाठी प्रत्येक कार्यकर्त्याने आपल्या गावात आणि परिसरात सक्रियपणे काम करावे, समाजातील प्रत्येक घटकाला सोबत घेऊन पुढे जावे आणि आगामी काळात युवकांच्या प्रश्नांसाठी अधिक आक्रमकपणे काम करण्याचा निर्धार करावा, असा संदेश यावेळी देण्यात आला.

जेजुरी येथे झालेल्या या मेळाव्याला मिळालेला तरुणांचा उत्स्फूर्त प्रतिसाद हा भाजप युवा मोर्चाच्या वाढत्या संघटनात्मक ताकदीचे दर्शन घडवणारा ठरला. हजारो युवा कार्यकर्त्यांच्या उपस्थितीत ‘युवा निर्धाराचा नारा देत संघटन विस्तार आणि युवकांच्या प्रश्नांसाठी संघर्ष करण्याचा निर्धार करण्यात आला.

या प्रसंगी भाजप युवा मोर्चाचे प्रदेशाध्यक्ष कृष्णराज जी महाडीक, भाजप पुणे ग्रामीणचे प्रभारी सदाशिव खाडे, आमदार गोपीचंद पडळकर, पुरंदरचे माजी आमदार संजय जगताप, भाजप पुणे जिल्हा दक्षिण ग्रामीणचे जिल्हाध्यक्ष शेखर वढणे, भाजप युवा मोर्चा पुणे जिल्हा ग्रामीणचे जिल्हाध्यक्ष वैभव सोलणकर, भाजप सरचिटणीस बाळासाहेब गरुड, वैशाली सणस, अविनाश मोठे, पांडुरंग कचरे, भाजप नेते खलिल काजी, गोविंद देवकते, युवा मोर्चा महामंत्री स्वप्नील मोडक, अमर बुदगुडे, विवेक साळुंके, ओंकार कड्डे, मयूर शिंदे, अनिकेत भालेराव, युवती अध्यक्ष रसिका सणस,संदीप केसकर,शुभम रणवरे,यांच्यासह भाजप व युवा मोर्चाचे विविध पदाधिकारी, मंडल पदाधिकारी आणि हजारो युवा कार्यकर्ते मोठ्या संख्येने उपस्थित होते.