BJP National President । भाजपाच्या राष्ट्रीय अध्यक्षपदावरून मागच्या अनेक दिवसापासून चर्चांना उधाण आले आहे. रोज नवीन नाव समोर येताना पाहायला मिळत आहे. तर दुसरीकडे  भाजपाचे राष्ट्रीय अध्यक्ष जे. पी. नड्डा यांना मंत्रिमंडळात स्थान देण्यात आले असून त्यांचा कार्यकाळदेखील संपला आहे. त्यामुळे पक्षाच्या नवीन अध्यक्षाची माळ नेमकी कोणाच्या गळ्यात पडणार यावर अजूनही संभ्रम आहे. परंतु  पदासाठी मुख्य चार नावांची चर्चा जोरदारपणे होताना दिसून येत आहे.

अमित शाह यांच्यानंतर जे.पी. नड्डा बनले अध्यक्ष BJP National President । 
साल २०१४ मध्ये देशात भाजपाची सत्ता आल्यानंतर राष्ट्रीय अध्यक्षपदी अमित शाह विराजमान झाले होते. त्यानंतर  २०१९ मध्ये जे. पी. नड्डा हे भाजपाचे राष्ट्रीय अध्यक्ष झाले. त्यांच्या कार्यकाळात महत्त्वाचे निर्णयही घेण्यात आले. आता त्यांचा कार्यकाळ संपुष्ठात आला आहे.  त्यामुळे भाजपातील चार महत्त्वाची नावं या पदासाठी चर्चेत आहेत. यापैकी एका नावावर याच आठवड्यात म्हणजेच ६ एप्रिल रोजी शिक्कामोर्तब करण्यात येणार असल्याची माहिती समोर आली  आहे.

जे. पी. नड्डा यांचा कार्यकाळात कोणते निर्णय घेतले गेले ?
पक्षाच्या अध्यक्षपदाची सूत्रे हाती घेतल्यानंतर जे. पी. नड्डा यांनी अनेक मोठ्या जबाबदाऱ्या पार पाडाल्या. नड्डा यांनी पंतप्रधान नरेंद्र मोदी आणि अमित शाह यांच्याबरोबर प्रभावी कार्यसंबंध प्रस्थापित केले. भाजपाच्या राष्ट्रीय अध्यक्षपदाची धुरा सांभाळताना नड्डा यांनी आपली उपयुक्तता सिद्ध करून दाखवली. त्यांच्या प्रभावशाली भाषणांमुळे इतर राजकीय पक्षाच्या नेत्यांनी भाजपाची कास धरली आणि संपूर्ण देशभरात पक्षाला मोठी बळकटी मिळाली.

जे. पी. नड्डा यांच्या कारकिर्दीला वादाची लकेर 
अध्यक्षपदी असताना जे. पी. नड्डा यांनी भाजपाला लोकसभा आणि विधानसभा अशा २६ निवडणुकांमध्ये विजय मिळवून नवीन विक्रम प्रस्थापित केला. २०२३ च्या अखेरीस भाजपाने मध्य प्रदेश, राजस्थान आणि छत्तीसगड राज्यांमधील सत्ता कायम ठेवली. २०२४ च्या लोकसभा निवडणुकीदरम्यान  एका इंग्रजी वर्तमानपत्राला दिलेल्या मुलाखतीत नड्डा यांनी भाजपा आता स्वयंपूर्ण असून पक्षाला पूर्वीप्रमाणे राष्ट्रीय स्वयंसेवक संघाची आवश्यकता नाही असे विधान केले, ज्यामुळे भाजपा आणि आरएसएसमधील मतभेद उघड झाले . मात्र त्याचा परिणाम लोकसभा निवडणुकीत दिसून आला. यावेळी भाजपाच्या जागा ३०३ वरून २४२ पर्यंत खाली यावे लागले.

 अध्यक्षपदासाठी ‘ही’ चार नावे चर्चेत  BJP National President । 
शिवराज सिंग चौहान, भुपेंद्र यादव , मनोहरलाल खट्टर आणि धर्मेंद्र प्रधान ही चार नावे भाजपाच्या राष्ट्रीय अध्यक्षपदासाठी चर्चेत आहेत. ६ एप्रिलला भाजपाचा स्थापना दिवस आहे. त्यामुळे या दिवशी भाजपच्या नव्या अध्यक्षाचे नाव जाहीर करण्यात येणार असल्याची शक्यता वर्तवण्यात येत आहे.

दरम्यान , उत्तर प्रदेशातल्या एका नेत्याचं म्हणणं आहे की जिल्हा पातळीवरच्या निवडणुका होणं बाकी आहेत. त्या राज्यात सुरु झाल्या की भाजपाच्या राष्ट्रीय अध्यक्ष निवडीच्या प्रक्रियेला वेग येईल. विविध कारणं समोर येत आहेत. मात्र भाजपाच्या राष्ट्रीय अध्यक्षांची निवड का लांबते आहे याचं ठोस कारण अद्याप समोर आलेलं नाही. महाराष्ट्र विधानसभा निवडणुकीच्या आधी देवेंद्र फडणवीस यांच्याकडे राष्ट्रीय अध्यक्षपद दिलं जाईल अशाही चर्चा रंगल्या होत्या. मात्र देवेंद्र फडणवीस यांनी आपण महाराष्ट्रातच राहणार असं सांगितलं होतं. साधारण वर्षभरापूर्वी विनोद तावडेंचेही नाव चर्चेत होते. दरम्यान आता नवे चार चेहरे चर्चेत आहेत. त्यापैकी कुणाला राष्ट्रीय अध्यक्षपद मिळणार की भाजप पुन्हा एकदा धक्कातंत्र वापरणार हे पाहणे गरजेचे आहे .