bjp leader passes away : भारतीय जनता पक्षाचे ज्येष्ठ नेते आणि माजी विधानपरिषद सदस्य महेंद्र यादव यांचे सोमवारी रात्री उशिरा निधन झाले. ते ७५ वर्षांचे होते. गेल्या काही दिवसांपासून ते आजारी असून गोरखपूर येथील रुग्णालयात त्यांच्यावर उपचार सुरू होते. माहितीनुसार, त्यांना चार दिवसांपूर्वी प्रकृती खालावल्याने अतिदक्षता विभागात दाखल करण्यात आले होते. सोमवारी पहाटे सुमारे २ वाजता त्यांची प्राणज्योत मालवली. त्यांच्या निधनाची बातमी समजताच कार्यकर्ते आणि समर्थकांमध्ये शोककळा पसरली असून त्यांच्या निवासस्थानी मोठी गर्दी जमली. उत्तर प्रदेशातील मुंडेरा गावचे रहिवासी असलेले महेंद्र यादव हे शेतकरी कुटुंबातून राजकारणात आले होते. जमिनीशी घट्ट नाळ असलेले, सर्वसामान्यांशी जवळीक ठेवणारे नेते अशी त्यांची ओळख होती. त्यांनी भाजपचे जिल्हाध्यक्ष म्हणून काम पाहिले तसेच तीन वेळा विधानपरिषदेवर निवडून जात त्यांनी महत्त्वपूर्ण जबाबदाऱ्या सांभाळल्या. त्यांच्या राजकीय कारकिर्दीत त्यांनी १९८२ ते १९९७ दरम्यान ब्लॉक प्रमुख, १९९७ ते २००५ आणि नंतरच्या काळात विधानपरिषद सदस्य (MLC) तसेच २०११ ते २०१७ या कालावधीत जिल्हाध्यक्ष म्हणून काम केले. महेंद्र यादव यांच्या पश्चात दोन मुली आणि एक मुलगा असा परिवार आहे. त्यांचा मुलगा अभिषेक यादव हे गोरखपूरमधील नामांकित डॉक्टर असून त्यांच्या रुग्णालयातच यादव यांच्यावर उपचार सुरू होते. त्यांच्या निधनामुळे स्थानिक राजकारणात मोठी पोकळी निर्माण झाली असून, भाजपसह विविध क्षेत्रांतून शोक व्यक्त करण्यात येत आहे.